தமிழகத்தில் சட்டம் ஒழுங்கு சீரழிவு: அண்ணாமலை கண்டனம்

சென்னை: பா.ஜ., அலுவலகங்கள் மீது பெட்ரோல் குண்டு வீசப்பட்ட சம்பவத்திற்கு கண்டனம் தெரிவித்துள்ள அக்கட்சியின் மாநில தலைவர் அண்ணாமலை, தமிழகத்தில் சட்டம் ஒழுங்கு சீரழிந்து வருவதாகவும், அதனை மக்கள் பார்த்து கொண்டுள்ளனர் எனக்கூறியுள்ளார்.


கோவையின் குனியமுத்துார் புட்டுவிக்கி சாலையில் சென்ற அரசு பஸ் மீதும், என்.எச்., ரோட்டில் சென்ற அரசு பஸ் மீதும், மர்ம நபர்கள் கல் வீசித் தாக்கி கண்ணாடியை உடைத்தனர்.நேற்று இரவு 8:30 மணிக்கு ஒரே நேரத்தில், இரு இடங்களில் கெரசின் குண்டுகள் வீசப்பட்ட சம்பவமும் நடந்தது. மாவட்ட பா.ஜ., அலுவலகம் அமைந்துள்ள காந்திபுரம் வி.கே.கே.மேனன் ரோடு அருகே கெரசின் நிரப்பி திரி போடப்பட்ட பாட்டில், மர்ம நபர்களால் கொளுத்தி வீசப்பட்டது. எனினும் பாட்டில் வெடித்துச் சிதறவில்லை. அதை போலீசார் கைப்பற்றினர்.தகவல் பரவியதும், பா.ஜ., கட்சியினரும், போலீசாரும் அங்கு வந்து விசாரணை நடத்தினர்.


மேட்டுப்பாளையம் இரண்டு பிளைவுட் கடைகளில் பெட்ரோல் குண்டு மற்றும் பெட்ரோல் பாக்கெட்டுகள் வீசப்பட்டன. சேதம் ஏதும் இல்லை. போலீசார், வருவாய் துறையினர் விசாரணை நடத்தினர். இதனால், மேட்டுப்பாளையத்தில் பதட்டம் ஏற்பட்டுள்ளது.


இது தொடர்பாக அண்ணாமலை வெளியிட்ட அறிக்கை: கோவை மாவட்ட பாஜ., அலுவலகத்தில் மீது வீசப்பட்ட பெட்ரோல் வெடிகுண்டு, நம் சகோதர, சகோதரிகளை ஒரு போதும் தடுக்காது. மாறாக நமது நாட்டிற்கும், சமூகத்திற்கும் எதிரான இந்த சக்திகளுக்கு எதிராக, போராடுவதற்கு நமக்கு பலத்தை அளிக்கும். பா.ஜ., அலுவலகத்தில் பெட்ரோல் வெடிகுண்டு வீசி எங்களின் மன தைரியத்தை குறைத்துவிடலாம் என நினைத்து விட வேண்டாம்.


இதுபோன்ற அச்சுறுத்தல்கள் சமூக விரோதிகளுக்கு எதிரான எங்கள் சமூக பணியை மேலும் வேகப்படுத்தும். தமிழகத்தில் சட்டம் ஒழங்கை சீரழிந்து வருவதை திமுக அரசு உணர வேண்டும். இவ்வாறு அவர் கூறியுள்ளார்.