தமிழகத்தில் டில்லி மாடல் பள்ளிகள் திட்டம்: துவக்கி வைத்தார் கெஜ்ரிவால்

சென்னை பாரதி மகளிர் கல்லுாரி வளாகத்தில், இன்று(செப்., 5) காலை நடந்த விழாவில், டில்லி முதல்வர் அரவிந்த் கெஜ்ரிவால், மாடல் பள்ளி திட்டங்களை துவங்கி வைத்து பேசியதாவது: ஒவ்வொரு மாநிலமும், பிற மாநிலங்களில் உள்ள நல்ல திட்டங்களை எடுத்து கொள்ள வேண்டும். புதுமைப்பெண் திட்டம் பெண்களின் கல்விக்கு உதவுகிறது. பணக்காரர்கள் முதல் ஏழை வரை தரமான கல்வியை கொடுக்க வேண்டியது அரசின் கொள்கை. தரமான கல்வியை அரசு பள்ளிகள் மூலம் நம்மால் கொடுக்க முடியும்.. நாட்டில் பள்ளி செல்லும் 27 கோடி மாணவர்களில் 18 கோடி பேர் அரசு பள்ளிகளில் படிக்கின்றனர். நாடு முழுவதும் அரசு பள்ளிகளின் நிலைமை அனைவருக்கும் தெரியும். சிலவற்றை தவிர மற்றவை மோசமாக உள்ளது. நமது நாட்டை முதலிடத்திற்கு முன்னேற்ற கடுமையாக உழைத்து வருகிறோம்.



நமது நாட்டை வளர்ந்த நாடாக்க நாம் முயற்சிக்கிறோம். 66 சதவீத பள்ளிகளில் மோசமான கல்வி கிடைத்தால், எப்படி வளர்ந்த நாடாக்க முடியும். அரசு பள்ளிகளில் தரமான கல்வியை கொடுக்க முடியாதவரை, வளர்ந்த நாடு என்ற கனவு நீண்ட தூரத்திலேயே இருக்கும். மத்திய மாநில அரசுகள் ஒன்றிணைந்தால், அடுத்த 5 ஆண்டுகளில் அரசு பள்ளிகளை தரம் உயர்த்த முடியும். இந்தியாவிற்கே வழிகாட்டும் புரட்சிகரமான திட்டம் புதுமைப்பெண் திட்டம். இவ்வாறு அவர் பேசினார்.


விழாவில், முதல்வர் ஸ்டாலின், அமைச்சர்கள் பொன்முடி, கீதா ஜீவன், சேகர்பாபு, மகேஷ் மற்றும் துறை அலுவலர்களும், மாணவ - மாணவியரும் பங்கேற்றனர்.