புதுடில்லி: '' மக்களால் தேர்வு செய்யப்பட்ட பிரதமரை தடையில்லாமல் விமர்சிப்பவர்கள், நாட்டில் கருத்து சுதந்திரம் இல்லை என அழுகிறார்கள்'', என மத்திய சட்டத்துறை அமைச்சர் ரிஜிஜூ கூறியுள்ளார்.


உச்சநீதிமன்ற முன்னாள் நீதிபதி ஸ்ரீகிருஷ்ணா நாளிதழ் ஒன்றில் எழுதிய கட்டுரையில், இன்றைய நிலைமை மோசமாக உள்ளது. நான் பொது இடத்தில் நின்று, பிரதமர் முகத்தை எனக்கு பிடிக்கவில்லை எனக்கூறினால், எனது வீட்டில் ரெய்டு நடக்கலாம். என்னை கைது செய்யலாம். எந்த காரணமும் சொல்லாமல் சிறையில் தள்ளலாம். இதனை குடிமகன் என்ற வகையில் எதிர்க்கிறேன் எனக்கூறியிருந்தார்.


இதனை தொடர்ந்து, மத்திய சட்டத்துறை அமைச்சர் ரிஜிஜூ வெளியிட்ட அறிக்கையில் கூறியுள்ளதாவது: பொது மக்கள், பெரும்பான்மையினரால் தேர்வு செய்யப்பட்ட பிரதமரை, எல்லா நேரமும் தடையின்றி விமர்சித்து விட்டு, கருத்து சுதந்திரம் இல்லை என அழுகிறார்கள். அவர்கள், காங்கிரஸ் அமல்படுத்திய அவசர நிலை பற்றி பேசமாட்டார்கள். சில பிராந்திய கட்சியை சேர்ந்த முதல்வரை விமர்சிக்க தைரியம் இருக்காது. ஓய்வு பெற்ற நீதிபதி ஒருவர், மேற்கண்ட கருத்துகளை உண்மையாக சொன்னாரா எனக்கு தெரியாது. ஒரு வேளை அது உண்மையாக இருந்தால், அந்த அறிக்கையே அவர் பணியாற்றிய அமைப்பை இழிவுபடுத்துவதாக உள்ளது. இவ்வாறு அந்த அறிக்கையில் கூறப்பட்டு உள்ளது.