கோவை:''ஆளுங்கட்சியுடன் கூட்டணி வைத்துள்ளதால், காங்., கட்சிக்கு முழுமையான சுதந்திரம் இல்லை,'' என, காங்., - எம்.பி., கார்த்தி சிதம்பரம் கூறினார்.

கோவை விமான நிலையத்தில், நிருபர்களிடம் அவர் கூறியதாவது:குலாம் நபி ஆசாத் உட்பட, கட்சியை விட்டு எந்த ஒரு தொண்டன் சென்றாலும், அது பின்னடைவு தான்.இந்தியாவில் ஹிந்தி, ஹிந்துத்துவா கொள்கை கொஞ்சம் வேரூன்றி இருக்கின்றன. ஹிந்துத்துவா கொள்கையை எதிர்த்து, நாங்கள் வைக்கும் வாதம் இப்போதைக்கு எடுபடவில்லை;

எதிர்க்கட்சிகள் ஒரே அணியில் இல்லை.தமிழகத்தில் ஆளுங்கட்சியோடு கூட்டணி வைத்துள்ளதால், காங்., கட்சிக்கு முழுமையான சுதந்திரம் கிடையாது.கடந்த ஓராண்டு ஆட்சியில், முதல்வரின் செயல்பாடுகளை பொறுத்தவரை மிகவும் சுறுசுறுப்பாகவும், வெளிப்படையாகவும், மக்கள் எளிதில் அணுகக் கூடியவராகவும் உள்ளார்.இவ்வாறு அவர் கூறினார்.