சென்னை-மக்களை தேடி மருத்துவ திட்டத்தில் பயன் பெறும் நோயாளிகள், உரிய நேரத்தில் மருந்து கிடைக்காமல் அவதிக்கு ஆளாகி வருகின்றனர்.தமிழகத்தில் 2021 ஆக., 5ல், 'மக்களை தேடி மருத்துவ திட்டம்' துவக்கப்பட்டது.


இத்திட்டத்தில், சர்க்கரை நோய், உயர் ரத்த அழுத்தம் உள்ளிட்ட நாள்பட்ட நோயால் பாதிக்கப்பட்டோர் வீடுகளுக்கே சென்று மருந்து, மாத்திரைகள் வழங்கப்படுகின்றன.அந்த வகையில் உயர் ரத்த அழுத்தம் 33.12 லட்சம்; நீரிழிவு நோயாளிகள் 23.07 லட்சம்; ரத்த அழுத்தம் மற்றும் நீரிழிவு நோயாளிகள் 16.86 லட்சம் என, பல்வேறு நோயால் பாதிக்கப்பட்ட 84 லட்சம் பேர், இதுவரை பயனடைந்து வருகின்றனர்.


இந்நிலையில், உரிய நேரத்தில் மருந்து, மாத்திரைகள் வழங்கப்படுவதில்லை என்ற குற்றச்சாட்டு எழுந்து உள்ளது.இது குறித்து, நோயாளிகள் கூறியதாவது:இந்த திட்டத்தில் 15 நாட்களுக்கு ஒருமுறை மருந்து, மாத்திரைகள் வழங்கப்படுகின்றன. ஆரம்பத்தில் மருந்து, மாத்திரைகள் காலியாகும் தேதிக்கு முன்னதாக தெரிவித்தால், வீடுகளுக்கு வந்து வழங்கி விடுவர்.தற்போது, காலம் கடத்துகின்றனர். மாத்திரைகள் காலியாகி விட்டதாக சொன்னாலும், வந்து தருவதில்லை.


அருகில் உள்ள ஆரம்ப சுகாதார நிலையங்களுக்கு போய் கேட்டால், மக்களை தேடி மருத்துவ திட்டத்தில் சேர்ந்தவர்களுக்கு, இங்கே மருந்துகள் வழங்க முடியாது என்கின்றனர்.எனவே, உரிய நேரத்தில் மருந்து, மாத்திரைகள் கிடைக்க, அதிகாரிகள் நடவடிக்கை எடுக்க வேண்டும்.இவ்வாறு அவர்கள் கூறினர்.