இல்லம் தேடி கல்வி திட்டத்தில் ஊக்கத்தொகை நிறுத்தம்  

சிவகங்கை:தமிழகத்தில் இல்லம் தேடி கல்வி திட்ட தன்னார்வலர்களுக்கு மே முதல் ஊக்கத்தொகை வழங்கவில்லை என புகார் எழுந்துள்ளது.

தமிழகத்தில் கொரோனா பரவலால் 2 ஆண்டுகளாக பள்ளிகள் மூடப்பட்டுஆன்லைனில் பாடம் நடத்தினர். இதனால் பல குழந்தைகளுக்கு கற்றல் திறன் பாதித்தது. அவற்றை களையும் பொருட்டு 2021 அக்.,ல் இல்லம் தேடி கல்வி திட்டத்தை அரசு அறிமுகம் செய்தது. இதன் மூலம் ஒன்று முதல் 8 ம் வகுப்பு வரை படிக்கும் மாணவர்கள் வீடு தேடி சென்று தன்னார்வலர்கள் பாடம் கற்பித்து வருகின்றனர்.

இதற்காக மாநில அளவில் 11,000 தன்னார்வலர்கள் நியமித்து, மாதம் ரூ.1000 ஊக்கத்தொகை வழங்கப்படுகிறது. கடந்த மே மாதத்தில் இருந்து தன்னார்வலர்களுக்கான ஊக்கத்தொகை வழங்கப்படவில்லை.தன்னார்வலர்கள் கூறியதாவது: சேவை நோக்கில் தான் இப்பணியை செய்கிறோம். இருந்தாலும், அரசு உறுதியளித்த ஊக்கத்தொகையை மே மாதத்தில் இருந்து வழங்கவில்லை. அவற்றை குறித்த காலத்தில் வழங்காமல் தாமதம் செய்வது நியாயமல்ல, என்றனர்.