சென்னை : சுதந்திர தினத்தை முன்னிட்டு, நேற்று 'டாஸ்மாக்' கடைகளுக்கு விடுமுறை என்பதால், முந்தைய நாளான ஞாயிற்றுக் கிழமை ஒரே நாளில் மட்டும், 274 கோடி ரூபாய் மதிப்பிலான மதுபான வகைகள் விற்பனையாகி உள்ளன.


தமிழக அரசின் டாஸ்மாக் நிறுவனம் சில்லரை கடைகள் வாயிலாக தினமும் சராசரியாக, 100 கோடி ரூபாய் மதிப்பிலான பீர் மற்றும் மது வகைகளை விற்பனை செய்கிறது. இது, வார விடுமுறை மற்றும் தீபாவளி உள்ளிட்ட விசேஷ விடுமுறை நாட்களில் அதிகரிக்கிறது. சனி, ஞாயிறு வார விடுமுறையுடன் சுதந்திர தினத்தை முன்னிட்டு, நேற்றும் பொது விடுமுறை. மூன்று நாட்கள் தொடர் விடுமுறையை கொண்டாட, பலரும் சுற்றுலா மையங்களுக்கு படையெடுத்துள்ளனர்.


நேற்று மது கடைகளுக்கு விடுமுறை என்பதால், 'குடி'மகன்கள், ஞாயிற்றுக் கிழமை அதிகளவில் மது வகைகளை வாங்கியதால், அன்று மது விற்பனை களைகட்டியது. அன்று மட்டும், 274 கோடி ரூபாய் மதிப்பிலான மதுபான வகைகள் விற்பனையாகி உள்ளன.


அதில் சென்னை மண்டலத்தில் உள்ள மது கடைகளில், 56 கோடி ரூபாய்; திருச்சி மண்டலத்தில், 53.50 கோடி ரூபாய்; சேலத்தில், 54 கோடி ரூபாய்; மதுரையில், 58.26 கோடி ரூபாய்; கோவை மண்டலம், 52.29 கோடி ரூபாய்க்கு மதுபான வகைகள் விற்பனையாகி உள்ளன.