ரூ.2.15 லட்சம் நகை, பணம் திருட்டு

உளுந்துார்பேட்டை-உளுந்துார்பேட்டையில், கார் கண்ணாடியை உடைத்து 2.15 லட்சம் ரூபாய் மதிப்புள்ள நகை, பணத்தை திருடிய மர்ம நபர்களை போலீசார் தேடி வருகின்றனர்.தஞ்சாவூர் மாவட்டம், பாபநாசம் அடுத்த ராஜகிரியைச் சேர்ந்தவர் அப்துல் கரீம், 34; சென்னை, அம்பத்துாரில் தொழில் செய்து வருகிறார். இவர் தனது குடும்பத்தினருடன் தஞ்சாவூருக்கு கடந்த 3ம் தேதி இரவு ஹூண்டாய் காரில் சென்று கொண்டிருந்தார். 8:45 மணியளவில் உளுந்துார்பேட்டை டோல்கேட் பகுதியில் உள்ள ஹோட்டலில் சாப்பிடுவதற்காக காரை நிறுத்திச் சென்றார்.சாப்பிட்டு விட்டு வந்து பார்த்தபோது, காரின் இடது பக்க கண்ணாடியை உடைத்து காரில் வைத்திருந்த 40 ஆயிரம் ரூபாய் மதிப்புள்ள 2 சவரன் நகை மற்றும் ஒரு லட்சத்து 75 ஆயிரம் ரூபாய் இருந்த பை திருடு போயிருப்பது தெரியவந்தது.இதுகுறித்து அப்துல்கரீம் நேற்று முன்தினம் கொடுத்த புகாரின் பேரில் உளுந்துார்பேட்டை போலீசார் வழக்குப்பதிந்து மர்ம நபர்களைத் தேடி வருகின்றனர்.