புதுடில்லி-ஜனாதிபதி தேர்தலில், தே.ஜ., கூட்டணி சார்பில் போட்டியிடும் திரவுபதி முர்முவுக்கு, அந்த கூட்டணி மட்டுமின்றி, பெரும்பாலான மாநில கட்சிகளும் ஆதரவு தெரிவித்துள்ளன. இதையடுத்து, 60 சதவீதத்துக்கும் அதிகமான ஓட்டுகளை பெற்று, அவர் வெற்றி பெறுவது உறுதி என, அரசியல் வட்டாரங்கள் தெரிவித்தன.



ஜனாதிபதி ராம்நாத் கோவிந்தின் பதவிக் காலம் முடிவடைவதை அடுத்து, புதிய ஜனாதிபதியை தேர்வு செய்வதற்கான தேர்தல், நாளை மறுநாள் நடக்கவுள்ளது.இதில், ஆளும் தே.ஜ., கூட்டணி சார்பில், ஜார்க்கண்ட் முன்னாள் கவர்னரும், பழங்குடியினத்தைச் சேர்ந்தவருமான திரவுபதி முர்மு போட்டியிடுகிறார். காங்கிரஸ் உள்ளிட்ட எதிர்க்கட்சிகள் சார்பில், முன்னாள் மத்திய அமைச்சர் யஷ்வந்த் சின்ஹா போட்டியிடுகிறார்.


தேர்தல் நெருங்கும் நேரத்தில் திரவுபதி முர்முவுக்கு, எதிர்க்கட்சி கூடாரத்தில் இருந்தும் ஆதரவு அதிகரித்து வருகிறது. ஒடிசாவின் ஆளுங்கட்சியான பிஜு ஜனதா தளம், ஆந்திராவின் ஆளுங்கட்சியான ஒய்.எஸ்.ஆர்.,காங்கிரஸ், எதிர்க்கட்சியான தெலுங்கு தேசம் ஆகிய கட்சிகள் ஆதரவு தெரிவித்துள்ளன.கர்நாடகாவில் தேவ கவுடாவின் மதச் சார்பற்ற ஜனதா தளம், பஞ்சாபில் அகாலி தளம், மஹாராஷ்டிராவில் சிவசேனா, ஜார்க்கண்டில் ஜார்க்கண்ட் முக்தி மோர்ச்சா ஆகிய கட்சிகளும் திரவுபதிக்கு ஆதரவு தெரிவித்துள்ளன.

அ.தி.மு.க., பகுஜன் சமாஜ் கட்சிகளும் ஆதரவு தெரிவித்துள்ளன. பா.ஜ.,வை அரசியல் ரீதியாக கடுமையாக எதிர்க்கும் அகாலி தளம், ஜார்க்கண்ட் முக்தி மோர்ச்சா, சிவசேனா ஆகிய கட்சிகளும் திரவுபதிக்கு ஆதரவு தெரிவித்துள்ளது, அரசியல் வட்டாரத்தில் ஆச்சரியத்தை ஏற்படுத்தி உள்ளது. திரவுபதி முர்மு பழங்குடியினத்தைச் சேர்ந்த பெண் என்பதால், பா.ஜ., எதிர்பார்க்காத கட்சிகளில் இருந்தெல்லாம் தொடர்ந்து ஆதரவு அதிகரித்து வருகிறது. தற்போது லோக்சபா மற்றும் ராஜ்யசபாவில் 776 எம்.பி.,க்கள் உள்ளனர். ஒவ்வொரு எம்.பி.,யின் ஓட்டு மதிப்பும் 700 என நிர்ணயிக்கப்பட்டுள்ளது.


இதில், பா.ஜ.,வுக்கு மட்டுமே 393 எம்.பி.,க்கள் உள்ளனர். தே.ஜ., கூட்டணிக்கு 440 எம்.பி.,க்கள் உள்ளனர். இது தவிர, பல்வேறு மாநிலங்களிலும் உள்ள எம்.எல்.ஏ.,க்களின் ஓட்டுகளும் திரவுபதிக்கு கிடைக்கும். எம்.எல்.ஏ.,க்களின் ஓட்டு மதிப்பு, ஒவ்வொரு மாநிலத்துக்கும் மாறுபடும். உ.பி.,யில் உள்ள 273 பா.ஜ., - எம்.எல்.ஏ.,க்கள் வாயிலாக மட்டுமே, திரவுபதிக்கு 56 ஆயிரத்து 784 ஓட்டுகள் கிடைக்கும். இங்கு, ஒரு எம்.எல்.ஏ.,வின் ஓட்டு மதிப்பு 208 என நிர்ணயிக்கப் பட்டுள்ளது.


இதன்படி கணக்கிடும்போது, மொத்தமுள்ள 10 லட்சத்து 86 ஆயிரத்து 431 ஓட்டுகளில், திரவுபதிக்கு 6.67 லட்சம் ஓட்டுகள் கிடைக்கும் என எதிர்பார்க்கப்படுகிறது. இதன் வாயிலாக பழங்குடியினத்தைச் சேர்ந்த பெண், நாட்டின் முதல் குடிமகள் அரியணையில் அமர்வதற்கான வாய்ப்பு உறுதியாகி உள்ளதாக அரசியல் வட்டாரங்கள் தெரிவித்தன.