சென்னை : கோடநாடு கொலை மற்றும் கொள்ளை வழக்கு தொடர்பாக, சசிகலாவிடம் மீண்டும் விசாரிக்க, போலீசார் முடிவு செய்துள்ளனர்.


தமிழக முதல்வராக இருந்த ஜெயலலிதா, நீலகிரி மாவட்டம், கோடநாடு பகுதியில் உள்ள பங்களாவில் தங்கி வந்தார். இவரது மறைவுக்கு பின், 2017 ஏப்.,23ல் அந்த பங்களாவில் மர்ம நபர்கள் கொள்ளையில் ஈடுபட்டனர்.தடுக்க முயன்ற காவலாளி ஓம் பகதுார், 57, கொல்லப்பட்டார். மற்றொரு காவலாளி கிருஷ்ண பகதுார், 37, என்பவர் படுகாயமடைந்து உயிர் தப்பினார். இதுகுறித்து போலீசார் விசாரித்து வந்தனர்.


இச்சம்பவத்தில் தேடப்பட்டு வந்த, சேலம் மாவட்டத்தைச் சேர்ந்த, ஜெயலலிதாவின் முன்னாள் கார் ஓட்டுனர் கனகராஜ் விபத்தில் சிக்கி இறந்தார்.அதேபோல, கேரள மாநிலத்தைச் சேர்ந்த சயான் என்பவர் குடும்பத்துடன் காரில் சென்றபோது, கன்டெய்னர் லாரி மோதியதில் காயத்துடன் தப்பினார். அவரது மனைவி பிரியா, 31; மகள் நீது, 6, ஆகியோர் உயிரிழந்தனர்.


கோடநாடு பங்களாவில் கணினி ஆபரேட்டராக பணிபுரிந்த நீலகிரி மாவட்டம், கொங்கையரைச் சேர்ந்த தினேஷ்குமார், 29, தற்கொலை செய்து இறந்தார்.கோடநாடு கொலை மற்றும் கொள்ளை வழக்கில் தொடர்புடைய நபர்கள் அடுத்தடுத்து மர்மமான முறையில் இறந்தது பல்வேறு சந்தேகங்களை ஏற்படுத்தி உள்ளது. இதுகுறித்து, மேற்கு மண்டல ஐ.ஜி., சுதாகர் தலைமையிலான தனிப்படை போலீசார் விசாரித்து வருகின்றனர்.


இரு தினங்களுக்கு முன், அ.தி.மு.க.,வைச் சேர்ந்த முன்னாள் எம்.எல்.ஏ., ஆறுகுட்டி, தொழில் வர்த்தகர்கள் ஆறுமுகசாமி, இவரது மகன் செந்தில்குமார், புதுச்சேரி தனியார் விடுதி உரிமையாளர் நவீன் பாலாஜி உள்ளிட்டோரிடம் விசாரித்து வாக்குமூலம் பெற்றனர்.சென்னை சி.ஐ.டி., காலனியில், செந்தில்குமாருக்கு சொந்தமான அலுவலத்தில், கோவை டி.ஐ.ஜி., முத்துசாமி தலைமையிலான போலீசார் சோதனை நடத்தி, சில ஆவணங்களை கைப்பற்றினர்.


இதற்கிடையே, ஏப்ரலில், ஜெயலலிதாவின் நெருங்கிய தோழி சசிகலாவிடம், இரண்டு நாட்களாக விசாரணை நடத்தி வாக்குமூலம் பெற்றனர்; வீடியோ பதிவும் செய்தனர்.கோடநாடு கொலை மற்றும் கொள்ளை வழக்கில், 230க்கும் மேற்பட்டோரிடம் விசாரணை நடத்தப்பட்டுள்ளது. இதன் அடிப்படையில், சசிகலாவிடம் மீண்டும் விசாரணை நடத்த போலீசார் முடிவு செய்துள்ளனர்.