தகவல் உரிமை சட்டத்தில் பதில் அளிக்காத துணை தாசில்தாருக்கு ரூ. 25,000 அபராதம்

கடலுார் : தகவல் பெறும் உரிமை சட்டத்தில் மனுதாரருக்கு பதில் அளிக்காத விருத்தாசலம் துணை தாசில்தாருக்கு 25,000 ரூபாய் அபராதம் விதிக்கப்பட்டுள்ளது.கடலுார் கலெக்டர் அலுவலகத்தில் சென்னை தகவல் உரிமை ஆணையர் பிரதாப்குமார், தகவல் பெறும் உரிமை சட்டத்தின் கீழ் மேல்முறையீட்டு மனுக்கள் குறித்து நேற்று விசாரணை நடத்தினார்.

கலெக்டர் பாலசுப்ரமணியன் தலைமையில் நடந்த மக்கள் குறை தீர் கூட்டத்தில் ஆணையர் பிரதாப்குமார் பங்கேற்று தகவல் பெறும் உரிமை சட்டம் குறித்து அதிகாரிகளுக்கு ஆலோசனை வழங்கினார். தகவல் கோரி வரும் அனைத்து மனுக்களுக்கும் அதிகாரிகள் தகவல் தெரிவிக்க வேண்டும். மூன்றாவது நபர், தனிநபர் குறித்த தகவல் மட்டும் அளிக்க தேவையில்லை. ஒருவர் எத்தனை முறை மனு கொடுத்து கேட்டாலும் கட்டாயம் தகவல் கொடுக்க வேண்டும் எனக்கூறினார்.

பின் நிருபர்களிடம் அவர் கூறியதாவது: தகவல் பெறும் உரிமை சட்டத்தில் தகவல் பெறுவதில் நகர மக்களை விட கிராம மக்கள் விழிப்புணர்வு அடைந்துள்ளனர். மேல் முறையீட்டு மனு, நாள் ஒன்று 500க்கு மேல் வருகிறது. இதில் ஊரக வளர்ச்சி முகமை, வருவாய்த்துறை, போன்ற துறைகள் மீது பட்டா மாற்றம், நில ஆக்கிரமிப்புகள், ஊராட்சி பணி முறைகேடுகள் போன்றவை குறித்து தகவல் கேட்டு விண்ணப்பிக்கின்றனர்.

கடலுார் மாவட்டத்தில் சிதம்பரம், விருத்தாசலம், பண்ருட்டி, கடலுார் போன்ற பகுதிகளில் இருந்து 40 மேல் முறையீட்டு மனுக்கள் வந்துள்ளன. அது போன்று இன்று 40 மேல் முறையீட்டு மனுக்கள் மீது தீர்வு காணப்பட்டுள்ளன.பட்டா மாற்றம் குறித்து தகவல் கேட்டு 2020ல் விண்ணப்பித்த மனுதாரருக்கு தகவல் கொடுக்காமல் காலம் தாழ்த்தி வந்த விருத்தாசலம் துணை தாசில்தாருக்கு 25,000 ரூபாய் அபராதம் விதித்தும், பட்டா மாற்றம் குறித்த தகவல் இரு நாட்களில் வழங்க வேண்டும் என உத்தரவிட்டுள்ளதாக ஆணையர் பிரதாப்குமார் கூறினார்.