பழனிசாமி மீது ராகுலின் பாசம்

சென்னை: அ.தி.மு.க.,வில் நடக்கும் உட்கட்சி மோதலில், முன்னாள் துணை முதல்வர் பன்னீர் செல்வத்தை ஓரங்கட்டி, முன்னால் முதல்வர் பழனிசாமி கட்சித் தலைமையை கைப்பற்ற போகிறார் என்பது ஏறக்குறைய முடிவாகிவிட்டது. இந்நிலையில் பழனிசாமியிடம், காங்., முன்னாள் தலைவர் ராகுல் தொடர்பில் இருப்பதாக சொல்லப்படுகிறது.ராகுல் ஒருசில முறை பழனிசாமியுடன் பேசியுள்ளாராம்.

காங்கிரஸ் ஏற்கனவே தி.மு.க., கூட்டணியில் இருக்கும் நிலையில், பழனிசாமி மீது ராகுலுக்கு பாசம் வர காங்கிரசின் தற்போதைய தேர்தல் வியூக நிபுணர் சுனில் என சொல்லப்படுகிறது.பேரறிவாளன் விடுவிப்பு விவகாரத்தில் தி.மு.க., மீது கடுப்பில் உள்ள ராகுல், தமிழகத்தில் தி.மு.க.,வை கழற்றிவிட்டால், அதற்கு ஒரு மாற்று இருக்க வேண்டும் என்பதால் பழனிசாமியுடன் தொடர்பில் இருக்கிறாராம்.தமிழகத்தில் தி.மு.க., மற்றும் அ.தி.மு.க.,வுடன் மாறி மாறி கூட்டணி வைத்து காங்கிரஸ் தேர்தலை சந்தித்துள்ளது. எனவே அ.தி.மு.க.,வை கையில் வைத்துக் கொள்ள வேண்டும் என ராகுலுக்கு சுனில் 'அட்வைஸ்' செய்துள்ளாராம்.

இதைத் தவிர, ராகுலுக்கு நெருக்கமாக உள்ள இரண்டு தமிழக காங்., - எம்.பி.,க்களும், அ.தி.மு.க.,வுடன் தொடர்பில் இருப்பது நல்லது என அவருக்கு ஆலோசனை அளித்துள்ளனராம்.பழனிசாமியும், பா.ஜ.,வுடன் கூட்டணியை தொடர விரும்பவில்லையாம். அக்கட்சியுடன் கூட்டணி தொடர்ந்தால், சிறுபான்மையினர் வாக்குகள் கிடைக்காது என்பதுடன், அமலாக்கத் துறை, சி.பி.ஐ., போன்ற மத்திய விசாரணை அமைப்புகளின் மிரட்டலை எதிர்கொள்ள வேண்டிஇருக்கும் என்கிறாராம், பழனிசாமி.

பிரபல தேர்தல் வியூக நிபுணர் பிரசாந்த் கிஷோருடன் பணியாற்றியவர் இந்த சுனில். பின் இவரே தனியாக நிறுவனம் துவங்கிவிட்டார். 2017ல் உ.பி.,யில் பா.ஜ.,விற்கு ஆலோசகராக இருந்துள்ள இவர், தமிழகத்தில் தி.மு.க., - அ.தி.மு.க., என இரண்டு திராவிட கட்சிகளுக்கும் வெவ்வேறு தேர்தல்களில் ஆலோசகராக பணியாற்றி உள்ளார்.