அனைத்து தீர்மானங்களும் நிராகரிப்பு: ஒற்றைத் தலைமையோடு அடுத்த பொதுக்குழு: கே.பி.முனுசாமி

சென்னை: அதிமுக பொதுக்குழுவில் 23 தீர்மானங்களும் நிராகரிக்கப்படுவதாகவும், ஒற்றை தலைமையோடு அடுத்த பொதுக்குழு கூடும் எனவும் அக்கட்சியின் துணை ஒருங்கிணைப்பாளர் கே.பி.முனுசாமி தெரிவித்தார்.

இன்று (ஜூன் 23) நடைபெற்ற அதிமுக பொதுக்குழு கூட்டத்தில் பன்னீர்செல்வமும், பழனிசாமியும் ஒரே மேடையில் அமர்ந்தனர். இந்த இருவரின் இடையே அவைத்தலைவர் தமிழ்மகன் உசேன் அமர்ந்திருந்தார். அரங்கம் முழுதும் பழனிசாமி ஆதரவாளர்கள் ஒற்றை தலைமை வேண்டும் என கோஷம் எழுப்பினர். மேலும், ஓபிஎஸ் ஒழிக என்றும் கோஷம் எழுப்பியதால் கூட்டத்தில் சலசலப்பு ஏற்பட்டது. இதனைத்தொடர்ந்து ஓபிஎஸ் பேச துவங்கும் போது அவர் பேசக்கூடாது என சில உறுப்பினர்கள் கூச்சலிட்டனர். பின்னர் பொதுக்குழுவில் 23 தீர்மானங்களையும் பொன்னையன் வழிமொழிவார் என அறிவிக்கப்பட்ட நிலையில், குறுக்கிட்ட முன்னாள் அமைச்சரும் இபிஎஸ் ஆதரவாளருமான சி.வி.சண்முகம், ‛அனைத்து தீர்மானங்களையும் இந்த பொதுக்குழு நிராகரிப்பதாக' காட்டமாக தெரிவித்தார்.
இதனைத் தொடர்ந்து பேசிய துணை ஒருங்கிணைப்பாளர் கே.பி.முனுசாமி, ‛பொதுக்குழு ஒப்புதல் அளித்த 23 தீர்மானங்களையும் அனைத்து பொதுக்குழு உறுப்பினர்களும் நிராகரித்துவிட்டனர். அனைவரும் ஒற்றை தலைமை வேண்டும் என கோரிக்கை விடுத்துள்ளனர். எனவே, ஒற்றை தலைமை தீர்மானத்தோடு இணைத்து அடுத்த பொதுக்குழு எப்போது கூடுகிறதோ அப்போது அனைத்து தீர்மானங்களும் நிறைவேற்றப்படும்' எனக்கூறினார். அப்போது அரங்கில் இருந்த அனைவரும் ஆரவாரமாக குரல் எழுப்பினர்.