dinamalar telegram
Advertisement

ஊழியர்களுக்கு சம்பளம் வழங்க... பணம் இல்லை! கூட்டுறவு கடன் சங்கங்கள் கவலை

Share
Tamil News
கோவை:போதுமான நிதியாதாரம் இல்லாததாலும்,கடன் தள்ளுபடி குறித்துஅரசின் முறையான அறிவிப்பு வெளியாகாததாலும், கூட்டுறவு கடன் சங்கங்கள் வருவாயை இழந்து, ஊழியர்களுக்கு சம்பளம் வழங்குவதற்கே தள்ளாடும் சூழலுக்கு தள்ளப்பட்டுள்ளன.கோவையில், 36 கூட்டுறவு பண்டகசாலை மற்றும் இரண்டு மொத்த விற்பனை சங்கங்கள் உள்ளன. இவை தவிர, 137 தொடக்க வேளாண்மை கூட்டுறவு சங்கங்கள், 13 பிரதான விற்பனை சங்கங்கள்(மார்க்கெட்டிங்) உள்ளன. அவற்றோடு, 1,401 கூட்டுறவு ரேஷன் கடைகள் உள்ளன.

இதில் சுமார் 1,000 பேர் பணிபுரிகின்றனர்.இவையனைத்தும், கோவை மண்டல கூட்டுறவுத்துறை இணை பதிவாளரின் கட்டுப்பாட்டின் கீழ் வருகின்றன. கடந்த ஆட்சியில் பயிர்க்கடன் தள்ளுபடி செய்ததால், ஏராளமான கூட்டுறவு சங்கங்களில் வருவாய் ஆதாரம் குறைந்து போனது.இச்சூழலில், தற்போதைய ஆட்சியில் தொடக்க வேளாண்மை கூட்டுறவு சங்கங்களில், ஐந்து பவுன் வரை நகைக்கடன் தள்ளுபடி செய்வதாக, அறிவிப்பு வெளியிடப்பட்டது.முதல், 82,000 கோடி ரூபாய் தள்ளுபடி செய்யப்படும் என்று அறிவிக்கபட்டது. பின்னர், 6,000 கோடி ரூபாய்க்கு தள்ளுபடி செய்யப்படும் என்று அரசு அறிவித்தது.

இதனால் கடன்தாரர்கள் வட்டி கூட செலுத்துவதில்லை.இதனால், கோவையிலுள்ள கூட்டுறவு கடன் சங்கங்களில், போதுமான வருவாய் ஆதாரம் இல்லாமல், அன்றாட அலுவலகம் மற்றும் நிர்வாக செலவுகளுக்கும், ஊழியர்களுக்கு சம்பளம் வழங்குவதற்கும் கூட நிதியில்லாத நிலை நீடிக்கிறது.

இது குறித்து, கூட்டுறவுத்துறையில் பணிபுரியும் பெயர் வெளியிட விரும்பாத அதிகாரிகள் சிலர் கூறியதாவது:அரசின் தங்கநகை கடன் தள்ளுபடி அறிவிப்பு வெளியானதிலிருந்து, நகைக்கடனுக்கான வட்டியை கடன் பெற்றவர்கள் யாரும் செலுத்துவதில்லை. காலாவதிக்காலம் முடியும் தருவாயிலுள்ள நகைக்கான தொகையை செலுத்தி, புதுப்பிக்கக்கூட யாரும் முன் வருவதில்லை.இதனால் வழக்கமாக கூட்டுறவு சங்கங்களுக்கு, விவசாயிகள் மற்றும் பொதுமக்களிடமிருந்து வருவாயாக வந்து சேர வேண்டிய தொகை வந்து சேரவில்லை.கூட்டுறவு ரேஷன் கடைகளுக்கு, தற்போது சங்கத்தின் வாயிலாக தொகையை வழங்கி விட்டு, அடுத்து அரசிடமிருந்து மானியமாக வரும் தொகையை, ஆண்டு இறுதியில் பெற்றுக்கொள்ளலாம் என்ற சூழலும் தற்போதைக்கு இல்லை.

போதுமான நிதியாதாரம் இல்லாததால், பெரும்பாலான கூட்டுறவு சங்கங்கள் மற்றும் அதன் கீழ் இயங்கும் ரேஷன்கடை பணியாளர்களுக்கு, மாதச்சம்பளம் கொடுக்க முடியவில்லை.பணியாளர்கள் கடும் சிரமத்தில் திணறி வருகின்றனர்.அரசு தள்ளுபடி அறிவிப்பு வெளியிடும் என்று எதிர்பார்த்து காத்திருக்கின்றனர். ஆனால் அரசோ, நகைக்கடன் அறிவிப்பை தொடர்ந்து தள்ளிப்போட்டு வருகிறது.அரசு இது குறித்து அறிவிப்பு வெளியிட்ட பின்புதான், மாற்றுத்திட்டம் குறித்து யோசித்து நல்லதொரு முடிவெடுக்க முடியும்.இவ்வாறு, அதிகாரிகள் கூறினர்.
Share
தினமலர் செய்தியை உடனுக்குடன் பெற Telegram app-ல் எங்களோடு இணைந்திருங்கள்.
Advertisement
 

Home வாசகர் கருத்து (1)

  • ராஜா -

    வருமானத்துக்கு உண்டான வழிகளை எல்லாம் மூடிவிட்டு தள்ளுபடி செய்தால் இது தான் நடக்கும். இங்கிருக்கும் அதிகாரிகள் அதுபோன்ற இலவச அறிவிப்பு வரும்போது வாயில் கொழுக்கட்டையா வைத்திருந்தார்கள்?

Advertisement