போகி கொண்டாட்டம்: சென்னையில் காற்றுமாசு அதிகரிப்பு

சென்னை: சென்னையில் போகி பண்டிகை கொண்டாட்டம் மற்றம் கடும் பனி காரணமாக, நகரின் பல பகுதிகள் புகைமண்டலமாக காட்சி அளித்தன. காற்றின் மாசுவும் அதிகரித்தது. போக்குவரத்து பாதிக்கப்பட்டதுடன், விமானம் தரையிறங்குவதும் பாதித்தது.
போகி பண்டிகை அன்று பழைய பொருட்களை எரிப்பது வாடிக்கை. முன்னர், பழைய டயர்கள், பிளாஸ்டிக் ரப்பர் பொருட்கள் எரிக்கப்பட்டன. இதனால், காற்றுமாசு அதிகரித்தது. இதனை, மாசுக்கட்டுப்பாட்டு வாரியம் விழிப்புணர்வு பிரசாரம் மற்றும் நடவடிக்கை காரணமாக கட்டுப்படுத்தி வருகிறது. தமிழகம் முழுவதும் போகி பண்டிகை இன்று(ஜன.,14) உற்சாகமாக கொண்டாடப்பட்டது. இதனால், பல இடங்களில், பழைய பொருட்களை எரித்தனர். பனிமூட்டம் காரணமாக துகள்கள் கரையாமல் காற்றில் மாசு அதிகரித்தது.
சென்னையில் திருவல்லிக்கேணி, மயிலாப்பூர், அண்ணாசாலை, ஆலந்தூர் வேளச்சேரியில் அடையாறு உள்ளிட்ட பல இடங்களில்காற்றுமாசு அதிகரித்தது. காற்றில் புகை கலந்ததால் எதிரில் வரும் வாகனங்கள் தெரியாத அளவுக்கு பனிமூட்டம் புகைபோல் சூழ்ந்து காணப்பட்டது. வாகன ஓட்டிகள் சிரமத்திற்குள்ளாகினர். முகப்பு விளக்குகளை எரியவிட்டபடி வாகனங்களை ஓட்டி சென்றனர்.

விமானங்கள் தாமதம்

கடும் பனிமூட்டம் காரணமாக சென்னை விமான நிலையத்தில் விமானங்கள் தரையிறங்குவதிலும், புறப்படுவதிலும் தாமதம் ஏற்பட்டது. 20 விமானங்கள் ஒரு மணி நேரம் தாமதமாக தரையிறக்கப்பட்டது. டில்லி, மும்பை உள்ளிட்ட ந கரங்களுக்கு செல்லும் வாகனங்கள் தாமதமாக கிளம்பின.
முதல்வர் இ.பி.எஸ்., சென்னையிலிருந்து சேலம் செல்ல திட்டமிட்டிருந்தார். ஆனால், கடும் புகைமூட்டம் காரணமாக 1.45 மணி நேரம் காத்திருந்து பின்னர் அவர் கிளம்பி சென்றார்.

தினமலர் செய்தியை உடனுக்குடன் பெற Telegram app-ல் எங்களோடு இணைந்திருங்கள்.