Advertisement

கருவறைக்குள் நுழைந்த பிராமணர் அல்லாத அர்ச்சகர்கள்!: வயலூர் கோவிலில் சர்ச்சை

திருச்சி மாவட்டம், வயலுார் முருகன் கோவிலில், 'அனைத்து ஜாதியினரும் அர்ச்சகராகலாம்' என்ற திட்டத்தின்படி, பணி ஆணை பெற்ற இருவர் கருவறைக்குள் நுழைந்ததால் சர்ச்சை வெடித்துள்ளது.

உறுதி



இது குறித்து, அகில இந்திய ஆதி சைவ சிவாச்சாரியார்கள் சேவை சங்கம் மற்றும் தெய்வீக கைங்கர்ய பேரவை நிர்வாகிகள் கூறியதாவது:திருச்சி மாவட்டம், வயலுார் முருகன் கோவில் பிரசித்தி பெற்றது. இங்கு முத்துக்குமாரர் சன்னதியுடன், ஆதிநாதர், ஆதிநாயகி, பொய்யா கணபதி உள்ளிட்ட பல சன்னதிகள் உள்ளன. ரமேஷ், கல்யாணம், அஜய், கார்த்தி ஆகியோர் அர்ச்சகர்களாக உள்ளனர்.

இவர்களில் சிலரை மட்டும், அறநிலையத் துறை பணி நிரந்தரம் செய்துள்ளது. இவர்கள் தலைமுறை தலைமுறையாக பணி புரிந்து வருகின்றனர். இவர்கள் தான், கருவறைக்குள் சென்று, முருகனை தொட்டு பூஜை செய்ய முடியும். இந்த நடைமுறை காலம் காலமாக உள்ளது. தமிழகத்தில் ஓராண்டுக்கு முன், தி.மு.க., ஆட்சிக்கு வந்ததும், அனைத்து ஜாதியினரும் அர்ச்சகராகலாம் என்ற திட்டத்தை கொண்டு வந்தது.

வயலுார் கோவிலில், ஓதுவார் மற்றும் முதலியார் இனத்தைச் சேர்ந்த தனபால், பிரபு ஆகியோர் அர்ச்சகர்களாக நியமிக்கப்பட்டனர். இருவரும் குறுகிய கால அர்ச்சகர் படிப்பு முடித்தவர்கள். இதற்கு எதிர்ப்பு வந்ததும், 'இருவரையும் கருவறைக்குள் பணியாற்ற அனுப்ப மாட்டோம்' என, கோவில் நிர்வாகம் உறுதி அளித்தது. இதனால், பிராமண அர்ச்சகர்கள் எதிர்ப்பை கைவிட்டனர். புதிதாக வந்த இருவரும், விநாயகர் மற்றும் நவக்கிரக சன்னதிகளில் பணி புரிய துவங்கினர்.

போலீஸ் குவிப்பு



இந்நிலையில், புதிதாக நியமிக்கப்பட்ட இருவரையும், கர்ப்பக் கிரஹத்திற்குள் அனுப்பி, மூலவருக்கு அர்ச்சனை செய்ய வைக்க வேண்டும் என, அந்தப் பகுதியைச் சேர்ந்த மக்கள் கலை இலக்கிய கழகத்தினர், கோவில் நிர்வாக அதிகாரிக்கு நெருக்கடி கொடுத்தனர். அதனால், இம்மாதம் 19ம் தேதி, அர்ச்சகர்கள் பிரபு மற்றும் தனபாலை, கர்ப்பக் கிரஹத்துக்குள் கோவில் நிர்வாகம் அனுப்பியது. உடன், அங்கு பணியில் இருந்த பிராமண அர்ச்சகர்கள் எதிர்ப்பு தெரிவித்தனர்.

'எங்களுக்கு கடும் நெருக்கடி உள்ளது. புதியவர்கள் அர்ச்சனை செய்வது போல போட்டோ மட்டும் எடுத்து செல்கிறோம்' என, கோவில் நிர்வாகம் தரப்பில் கூறினர். அதன்படி, போட்டோ எடுக்கப்பட்டது. இதன்பிறகும், அவர்கள்இருவரும் தொடர்ந்து கருவறை வாயிலிலேயே நின்று, அர்ச்சனை மற்றும் பூஜைகளில் ஈடுபட, பிராமண அர்ச்சகர்கள் அதை தடுத்தனர். கோவில் நிர்வாகம் புதியவர்களுக்கு ஆதர வாக இருப்பதால், பிராமண அர்ச்சகர்கள், கோவில் நிர்வாக அலுவலகம் முன் போராட்டம் நடத்தினர்.

அங்கு வந்த மக்கள் கலை இலக்கிய கழகத்தினர், புதிய அர்ச்சகர்களை அர்ச்சனை செய்ய வைத்து கோஷமிட்டு, கைதட்டி மகிழ்ந்தனர். அப்போது, கிறிஸ்துவ பெண் ஒருவர் சம்பந்தமே இல்லாமல், 'வாழ்க தமிழ்' என்று கோஷமிட்டுள்ளார். தகவல் அறிந்த பா.ஜ.,வினர் கோவிலுக்குள் கூடி விட்டனர். பெரிதாக பிரச்னை ஏற்படாமல் இருக்க, அங்கு போலீஸ் குவிக்கப்பட்டது.

கோவில் கருவறைக்குள் பூஜை, அர்ச்சனை செய்ய பிரத்யேக சம்பிரதாயங்கள் உள்ளன. அதை உடைத்து, பிராமண அர்ச்சகர்களை வெளியேற்ற வேண்டும் என திட்டமிட்டு, தமிழக அரசு செய்யும் காரியங்களால், பல இடங்களிலும் பிரச்னை ஏற்பட்டுள்ளது. மக்கள் கலை இலக்கிய கழகம் போன்ற இயக்கங்களும், இந்த விவகாரத்தில் களம் இறக்கி விடப்பட்டு உள்ளதால், அர்ச்சகர்கள் அச்சத்தில் உள்ளனர். உயர் நீதிமன்றம் வாயிலாக நல்ல தீர்ப்பு வந்தால் மட்டுமே, பிராமணஅர்ச்சகர்கள் கோவில்களில் நிம்மதியாக பணியாற்ற முடியும். இவ்வாறு அவர்கள் கூறினர்.

'சிறப்பு சலுகை கிடையாது!'



வயலுார் கோவில் உயர் அதிகாரி கூறியதாவது:அறநிலையத் துறை கோவில்களில், அர்ச்சகர் யார், நிர்வாகி யார், நிர்வாகத்தை எப்படி நடத்துவது என்பதை எல்லாம், அரசு தான் முடிவு செய்யும். அனைத்து ஜாதியினரும் அர்ச்சகராகலாம் என்ற அரசு ஆணைப்படி, வயலுார் கோவிலில் அர்ச்சகர் பணிக்கு இருவர் வந்துள்ளனர்.அவர்களும் முழு அர்ச்சகர்கள் தான். அவர்களுக்கும் கருவறைக்குள் சென்று, சுவாமியை தொட்டு பூஜை செய்ய தகுதி உண்டு.

'நாங்கள் பரம்பரையாக பூஜை செய்கிறோம். அதனால், நாங்கள் தான் பூஜை, அர்ச்சனை செய்வோம்' என்று கூறினால், அது தவறு. புதியவர்களை தடுப்பதும் சட்டப்படி தவறு. இதில் அரசியல் கிடையாது. மக்கள் கலை இலக்கிய கழகத்தினர் கோவிலுக்குள் வந்ததும், போலீசை வரவழைத்து விட்டோம். இப்போது, இரு தரப்பும் இணைந்து, அமைதியாக தான் பூஜைகள் நடக்கின்றன. மற்றபடி, பிராமணர்கள் என்பதாலும், பாரம்பரியமாக தொழில் செய்கின்றனர் என்பதாலும், யாருக்கும் ஹிந்து அறநிலையத் துறையில் சிறப்பு சலுகைகள் கிடையாது. இவ்வாறு அவர் கூறினார்.

- நமது நிருபர் --

Advertisement
 

வாசகர் கருத்து (25)

  • மனிதன் - riyadh,சவுதி அரேபியா

    கடவுள் படைப்பில் அனைவரும் சமம்தான்,யாருக்கும் உயர்ந்த அந்தஸ்து வழங்கப்படவில்லை... மனிதனை, மனிதனாக மட்டும் பார்த்தால் வாழ்க்கை பேரானந்தம்....

  • N Annamalai - PUDUKKOTTAI,இந்தியா

    மக்கள் கலை இலக்கிய சங்கம் எங்கு இருந்து வந்தார்கள் ?. கோவில் என்றால் கேவலம் .உண்டியல் பணம் மட்டும் வேண்டும் .என்ன அயோக்கியத்தனம் .

  • sankaranarayanan - Chennai-Tamilnadu,இந்தியா

    ஆனால் அரசியலில் மட்டும் பாரம்பரியம் வாரிசு என்று பார்த்து சமயோசிதமாக ஆட்சி நடந்து கொண்டிருக்கிறது. நீதி மன்றங்கள் வேடிக்கை பார்த்துக்கொண்டிருக்கின்றன. ஒரு சமுதாயத்தை அடியோடு மண்ணில் பத்தைந்து விட்டு மற்றொருவர்களை தூக்கி விடுவதுதான் அரசியல். நாட்டின் முன்னேற்றத்திற்கு பொருளாதாரத்தை முன்னேற்ற எவ்வளவோ காரியங்கள் உள்ளன. வழிகள் உள்ளன. அவைகளுக்கு எல்லாம் முன்னுரிமை கொடுக்காமல் ஒரு சமுதாயத்தினரை மாட்டு குறிக்கோள் வைத்து அழிப்பது கொடுமையிலும் கொடுமை. .

  • Senthil Kumar - chennai,இந்தியா

    ரொம்ப பதறுவதன் காரணம் இன்னும் இந்த அறிவு ஜீவிகளுக்கு புரியாது, அடிமை கூட்டம் அடிமை கூட்டமாக வாழ்ந்து பழக்கம் என்ன செய்வது வழித்தோன்றல்கள் மாறாது, கடவுளுக்கு சாதி மதம் ஏழை பணக்காரன் இல்லை, தமிழ்நாட்டில் பாடல் பெட்ரா தளங்கள் எதாவது வடமொழி இருக்க இருக்காது, தமிழ் மொழி பாடல் பெட்ரா தளம் மட்டும் உண்டு, அப்படி இருக்க கடவுளுக்கு முன்னாடி நீ மட்டும் தான் சொந்தம் சொல்லுறது சொல்லுறதுக்கு கேவலம் இல்லை அதற்க்கு சப்பை கட்டு இந்த வாசகர் வருவனுக , இந்துது மதம் அந்த மதம் இந்த மதம், கடவுள் ஒன்று அதை அடைய பல வழிகள் அவ்வளவுதான், தண்ணீர் பட்டேல் மாதரி எல்லோருக்கும் தாகம் எடுக்கும், ஒருத்தன் டம்ளர் ஈடுபான் குடம் ஈடுபான் ,பிஸ்லரி அகுபோவின,டீம் இப்படி பல பாத்திரம் அனால் தாகம் தீர்ப்பது தண்ணீர்.

  • J.V. Iyer - Singapore,சிங்கப்பூர்

    இதற்குத்தானே ஆசைப்பட்டு திமுகவுக்கு வோட்டு போட்டோம்? திமுகவை எதிர்த்து வோட்டு போடாமல் வீட்டில் டிவி பார்த்துவிட்டு இப்போது கத்துவதால் என்ன பயம்?

Advertisement