Advertisement

கமல்ஹாசன் போஸ்டர் மீது 'சாணி' அடித்தேன் - ராகவா லாரன்ஸ் சர்ச்சை பேச்சு

Share

ஏ.ஆர். முருகதாஸ் இயக்கத்தில் அனிருத் இசையமைப்பில் ரஜினிகாந்த், நயன்தாரா மற்றும் பலர் நடிக்கும் 'தர்பார்' படத்தின் இசை வெளியீட்டு விழா நேற்று(டிச.,7) சென்னையில் நடைபெற்றது.
நிகழ்ச்சியில் கலந்து கொண்டு இயக்குனரும், நடிகருமான ராகவா லாரன்ஸ் பேசிய பேச்சு சர்ச்சையாகி உள்ளது. நேற்று இரவு அவர் பேசிய உடனேயே சமூக வலைத்தளங்களில் பலரும் அவருடைய பேச்சுக்கு கண்டனங்களைத் தெரிவிக்க ஆரம்பித்தனர். அதன் பிறகு அதற்கு நள்ளிரவிலேயே விளக்கமும் கொடுத்துள்ளார் ராகவா.
அவர் பேசுகையில், “தலைவர் படம் ரிலீஸ் ஆகும் போது, போஸ்டர் ஒட்டும் போது சண்டை போட்டிருக்கிறேன். இங்க சொல்றதுல தப்பில்லை. கமல் சார் போஸ்டர் ஒட்டினால் அதுல போய் சாணி அடிப்பேன். அப்போ வந்து மனநிலைமை அப்படி இருந்தது. இப்ப பார்க்கும் போதுதான் தெரியுது, அவங்க ரெண்டு பேரும் அவ்வளவு குளோஸுன்னு. ரெண்டு பேரும் கை பிடிச்சி நடக்கும் போதெல்லாம் வேற ஏதோ நடக்கப் போகுதுன்னு தோணுது. அவ்வளவு தீவிரமான ரசிகனா இருந்த என்னை இப்ப முதல் வரிசைல உட்கார வச்சி அழகு பார்க்கற ஒரே மனுஷன் சூப்பர் ஸ்டார்தான்,” என்றார். அவருடைய இந்த பேச்சுக்கு ரஜினி ரசிகர்களும் பலமாக கைதட்டினர். தொடர்ந்து பேசுகையில் நாம் தமிழர் கட்சி சீமானையும் கிண்டலடித்தார். இதனால் நள்ளிரவில் கமல்ஹாசன் ரசிகர்களும், சீமான் கட்சி தொண்டர்களும் ராகவா லாரன்ஸுக்கு கடும் கண்டனங்களைத் தெரிவித்தனர்.
பின்னர் ராகவா லாரன்ஸ் அதற்கு ஒரு விளக்கமளித்தார். அதில், “தர்பார் இசை வெளியீட்டு விழாவில் நான் பேசிய பிறகு, கமல் சார் போஸ்டர் மீது நான் சாணி அடித்தது பற்றி பேசிய பேச்சு மட்டும் ஹைலைட் செய்யப்படுகிறது. நான் சிறு வயதில் தலைவரின் தீவிர ரசிகனாக இருந்த போது கமல் சார் பற்றித் தெரியாமல் செய்த விஷயம் அது. கமல் சார் மீது நான் மிகுந்த மரியாதை வைத்திருக்கிறேன். நான் எப்போதாவது தவறாகப் பேசியிருந்தால் அதற்கு மன்னிப்பு கேட்பேன். ஆனால், இங்கு நான் எதுவும் தவறாகப் பேசவில்லை. முழு வீடியோவைப் பார்த்தால் உங்களக்குப் புரியும். சிலர் இதை டிவிஸ்ட் செய்கிறார்கள். என் மனதில் கமல் சாருக்கு எவ்வளவு மரியாதை என்பது எனக்குத் தெரியும். அதை யாருக்கும் நிரூபிக்க வேண்டிய அவசியமில்லை. உங்களுக்கு ஏதாவது சந்தேகம் இருந்தால் இந்த வீடியோவைப் பாருங்கள்,” எனப் பதிவிட்டு அவர் பேசிய பேச்சின் வீடியோ லின்க் ஒன்றைப் பதிவிட்டுள்ளார்.

Share
தினமலர் செய்தியை உடனுக்குடன் பெற Telegram app-ல் எங்களோடு இணைந்திருங்கள்.
Advertisement
 

வாசகர் கருத்து

    முதல் நபராக கருத்து தெரிவியுங்கள்!

கருத்தைப் பதிவு செய்ய

Advertisement