Advertisement

விசிறித் தோகை பறவை

வான்கோழி
ஆங்கிலப் பெயர்: 'டர்க்கி' (Turkey)
உயிரியல் பெயர்: 'மெலியாகிரிஸ் காலாபாவோ' (Meliagris Gallapavo)
குடும்பம்: 'பாசியனிடே' (Phasianidae)

உருவத்தில் கோழியைவிடப் பெரியது வான்கோழி. தரையில் வசிக்கும் பறவை. இதன் தாயகம் தென் அமெரிக்கா. இவற்றில் பத்துக்கும் மேற்பட்ட வகைகள் உள்ளன. பெரிய கழுத்தும் அகலமான இறக்கைகளும் குட்டையான வாலும் உடையது. திறந்தவெளித் தோட்டங்களிலும், காட்டுப் பகுதிகளிலும் கூட்டமாக வசிக்கும். இவை பெரும்பாலும் நடந்தே செல்லும். அதிக வேகமாக ஓடவோ, பறக்கவோ இவற்றால் முடியாது.
உடற்பகுதி கருப்பு நிறத்தில் வெள்ளைப் புள்ளிகளுடனும், பழுப்பு நிறத்திலும் காணப்படும். சில வகை வான்கோழிகள் வால்பகுதி விரிந்த நிலையில் விசிறி போல காணப்படும். குறுகிய அலகும் கழுத்துப் பகுதியில் சிவப்பு நிறத்தில் தொங்குதசையும் இதன் தனித்துவ அடையாளங்கள். தானியங்கள், புழு, பூச்சிகளை உண்ணும். இது குறைந்த அளவு உணவே உண்ணும். குறுகிய காலத்தில் வளர்ந்துவிடும். 7 முதல் 8 மாதங்களில் முட்டையிடத் தொடங்கும். மண்ணில் வட்ட வடிவமான சிறிய பள்ளங்களை அமைத்து, அதில் முட்டை இடும். ஒரு மாதத்தில் 12 முட்டைகள் வரை இடும். முட்டை 70 கிராம் எடை இருக்கும். பெரும்பாலும் சுயமாக முட்டைகளை அடைகாப்பது இல்லை. 30 நாட்களில் முட்டை பொரிந்து குஞ்சுகள் வெளிவரும். நாய், நரி, கீரி, பூனை, காகம், கழுகு போன்றவை இவற்றின் எதிரிகள். எதிரிகளைக் கண்டால் சத்தமாக ஒலியெழுப்பும். இறைச்சிக்காக இவை பெருமளவில் வீடுகளிலும், பண்ணைகளிலும் வளர்க்கப்படுகின்றன.

எடை: 5 முதல் 11 கிலோ
ஆயுட்காலம்: 10 ஆண்டுகள்
உயரம்: 2 முதல் 4 அடி வரை

'டாம்' (Tom) - ஆண் வான்கோழி 'ஹென்' (Hen) - பெண் வான்கோழி 'போல்ட்' (Poult) - வான்கோழிக் குஞ்சு

- ப.கோபாலகிருஷ்ணன்

Advertisement
 
Outbrain

வாசகர் கருத்து

    முதல் நபராக கருத்து தெரிவியுங்கள்!

கருத்தைப் பதிவு செய்ய

Advertisement