Advertisement

அன்புடன் அந்தரங்கம்!

அன்புள்ள சகோதரிக்கு -
என் வயது, 42; தமிழ் பெண்; என் கணவர் தெலுங்கு. ஒரே நிறுவனத்தில் பணிபுரிந்து, காதலித்து, இரு வீட்டார் சம்மதத்துடன் திருமணம் செய்து கொண்டோம். எங்களுக்கு ஒரே மகள்; கல்லூரியில் படிக்கிறாள்.
ஆரம்பத்திலிருந்தே, இத்திருமணத்தில் என் மாமனாருக்கு விருப்பமில்லை. இருப்பினும், ஒரே மகன் என்பதால், ஏற்றுக் கொண்டார்.
திருமணமான புதிதில், அவர்களது பழக்கவழக்கம் புரியாமல் மிகவும் சிரமப்பட்டேன். என் மாமியார் கூட எதுவும் சொல்லிக் கொடுக்க மாட்டார். என் கணவர் மட்டும் தான் ஒரே ஆதரவு.
சிறிது சிறிதாக தெலுங்கு பேச கற்றுக் கொண்டேன். இன்று வரை, என் மாமனார் எதிரில் நின்று பேச மாட்டேன். ஆனாலும், ஏதாவது என் மனம் நோகும்படி பேசி விடுவார்.
அவர் முன், என்னுடன் சரளமாக பேசுவதற்கு கூட தயங்குவார், மாமியார். ஏனெனில், என்னுடன் சிரித்து பேசினால், மாமியாருக்கு திட்டு விழும். இதெல்லாம், என் கணவர் இல்லாத போதுதான். அவர் வீட்டில் இருந்தால், மாமனாரது நடவடிக்கை அப்படியே மாறிவிடும்.
என்னிடம் மட்டும் தான் இப்படி நடந்து கொள்வார். என் மகளிடம் நன்றாக பேசுவார். அவர்களது உறவினர் யாராவது வீட்டிற்கு வந்தால், நான் சமையலறையிலேயே இருந்து, அவர்களுக்கு வேண்டியதை செய்து தர வேண்டும். எனக்கு ஒத்தாசைக்கு மாமியார் வந்தால், 'நீ ரெஸ்ட் எடு; அவள் செய்யட்டும்...' என்பார்.
நானும், என் கணவரும் லோன் போட்டு, மூன்று பெட்ரூம் ப்ளாட் வாங்கி, அதில் தான் வசித்து வருகிறோம். ஆனால், என் வீட்டினரோ, தோழிகளோ வீட்டுக்கு வரக்கூடாது; அப்படியே யாராவது வந்து விட்டால், அன்று முழுக்க, 'முணுமுணு'வென்று திட்டியபடி இருப்பார்.
இதனால், இப்போதெல்லாம் பொறுமை இழந்து, உணர்ச்சி வசப்பட்டு, அவரிடம் கத்தி விடுவேனோ என்று பயமாக இருக்கிறது.
வீட்டுக்கு செல்வதற்கே வெறுப்பாக உள்ளது. இந்த, 'மென்ட்டல் டார்ச்சரிலிருந்து' மீள்வது எப்படி?
— இப்படிக்கு, உங்கள் சகோதரி.

அன்பு சகோதரிக்கு -
இன பேதம் பார்ப்பவர், உன் மாமனார். தன் ஒரே மகனுக்கு, தங்கள் ஜாதியில், வரதட்சணையுடன் பெண் எடுக்க, கனவு கண்டிருப்பார். அது காதல் என்ற பெயரில் புஸ்வாணம் ஆக, அந்த ஏமாற்றம் தந்த வெறுப்பை, உன் மீது காட்டுகிறார். அதேநேரம், உன் மகள், அவரது மகனின் வாரிசு அல்லவா... அதுதான், பேத்தி மீது மட்டும், 'டன்' கணக்கில் பாசத்தை கொட்டுகிறார்.
உன் மீதான வெறுப்பை பற்றி, உன் மாமியாரிடம் கூறியிருப்பார். அதனால் தான், அவர் முன். உன்னிடம் பேச, தர்மசங்கடமாய் நெளிகிறார், மாமியார்.
நீ, உன் மாமனாரின் இருப்பை அலட்சியப்படுத்துவதுடன், அவரை வெறுப்பேற்றும் விதமாக, உன் மாமியாரிடம் பாசத்தை கொட்டு. மனதை அமைதியாக வைத்துக் கொள்ள, தினம் யோகா செய்; உன் மாமனாரிடம் நேருக்கு நேர் மோதும் சந்தர்ப்பங்களை தவிர். அவர், உன்னை அவமானப்படுத்தினால், அவ்விடத்தை விட்டு அகன்று விடு.
உன் அலுவலகத்தில், உனக்கு வேண்டாத நபர் இருப்பர்; அவரை சமாளித்து தானே அலுவலகத்தில் பணிபுரிகிறாய்... காரணம், உனக்கு வேலையும், சம்பளமும் முக்கியம். அதைப் போன்று தான் குடும்பமும்... இங்கு, உன்னை பிடிக்காத அதிகாரியாய், உன் மாமனார்!
சகோதரி... புகுந்த வீட்டில் பிரச்னைகளை சந்திக்காத பெண்கள், உலகில் இல்லை. நீண்ட தூரம் செல்லும் ரயில் பயணத்தில் கரப்பான், எலி மற்றும் மூட்டைப் பூச்சி என, பல தொந்தரவுகளை சகித்தபடியே பயணத்தை தொடர்வது போல், புகுந்தவீட்டு பிரச்னைகளையும் சகித்து, வாழ்க்கையை நகர்த்த வேண்டும்.
அதனால், இதற்கெல்லாம் மனதை அலட்டாமல், கணவன், மகளுடன் வார இறுதியில் விரும்பியதை சமைத்து எடுத்து, 'பிக்னிக்' சென்று வா. வேலைக்கு சென்று வீடு திரும்பியவுடன், விரும்பிய இசை கேள். மாமனாரின் கெட்ட குணம் அகல, இறைவனை வேண்டு!
— என்றென்றும் தாய்மையுடன்
சகுந்தலா கோபிநாத்

Advertisement
 
Outbrain

வாசகர் கருத்து (9)

  • HoustonRaja - Houston,யூ.எஸ்.ஏ

    வணக்கம். இந்த அம்மா சும்மாங்காட்டி கூவுது, என நினைப்பவர்கள் - சற்றே தங்களை அப்பெண்ணின் நிலையில் போட்டுப்பார்த்து, உண்மையான சுய பரிசோதனை செய்யவும். நீங்கள் எதிர்பார்த்தது போல கடிதம் அமையவில்லை என்பதால், துன்பம் அனுபவித்து உதவி நாடுவோரை ஏசாதீர்கள். வேற்று மொழி/கலாச்சாரம் ஏற்று/கற்று, பெற்றோரின் சம்மதம் பெற்று, துணிந்து காதல் திருமணம் செய்துகொள்ள இவர் எவ்வளவு சிரமங்கள் கடந்து வந்திருப்பார். அதெல்லாம் எதற்காக? பணிக்கு சென்று, கடன் பெற்று கட்டிய வீடு எதற்காக? குடும்பத்தாரோடும், சுற்றம், நண்பர்களோடும் நிம்மதியாகவும், மகிழ்ச்சியாகவும் வாழத்தானே. உழைப்பின், உறவுகளின் பலனை அனுபவிக்கவிடாமல், இவரது மாமனாரே தடுத்தால் - அது இவருக்கு பல வருடங்களாக பெரும் மனவலியும், சித்ரவதையும் தானே தரும். எனவே, இது ஆலோசகர் சொல்வதைப்போல புறக்கணிக்கப்படவேண்டியதல்ல. இவர் செய்யவேண்டியது - 1. தொடர்ந்து இவருக்கு நேரும் மனவலியையும், அதன் காரணங்களையும் சுருக்கமாகவும் தெளிவாகவும், எழுத வேண்டும். 2. கணவனிடம் அதனை ஒரு கடிதமாக கொடுத்து படிக்கசொல்லவேண்டும். 3. இருவரும் பேசி, மாமனாரிடம் இவர்களுக்கான நியாயமான/நடைமுறைக்கேற்ற எதிர்பார்ப்புகளை பட்டியலிடவேண்டும். 4. கணவன் மாமனாரிடம் பேசி, எதிர்பார்ப்புகளை தெளிவாக தொடர்ந்து சொல்லிவரவேண்டும். 5. இதற்கெல்லாம், கணவன் ஒத்துழைக்கவில்லையென்றாலோ, ஒரு 6 மாதத்தில் மாமனார் மாறத் துவங்கவில்லையென்றாலோ - இப்பெண், ஒன்று மாமனாரை தனியாளாய் சமாளிக்கும்/வழிக்கு கொண்டுவரும் திறன்களை வளர்த்துக்கொள்ள வேண்டும் அல்லது, மாமனார்/மாமியாரை வீடு கடத்த (மாற்று வீட்டுக்கு அனுப்ப) வேண்டியது தான். வாழ்த்துக்கள்.

    • LAX - Trichy,இந்தியா

      ரொம்ப கரெக்ட்டா சொன்னீங்க Mr.ராஜா..

  • Natarajan Ramanathan - chennai,இந்தியா

    இதெல்லாம் ஒரு ப்ரச்சனையா?

    • LAX - Trichy,இந்தியா

      ஏன்..? நீங்களும் அந்த பெண் குறிப்பிட்டதுபோன்ற குணம் கொண்ட மாமனாரா..?

  • Malar - nsw,ஆஸ்திரேலியா

    அட போம்மா என்னவோ ஏதோ என்று பார்த்தேன்... நீயெல்லாம் கொஞ்சம் வெளியே வந்து உலகத்தை பார்க்க வேண்டும். கூடவே இருக்கும் மாமியார், மாமனார்கள் செய்யும் கொடுமைகளையும், பசி பட்டினி, ஆசிட், தீ, என்று நடக்கும் கொலைகளையும், எல்லாம் பற்றி உனக்கு தெரியாது ... பேசாம பொறுமையா, இறைவனிடம் வேண்டி கொஞ்சம் ஆன்மிகம் தேடி சமாதானம் வேண்டி பெற்றுக்கொள். ...

    • LAX - Trichy,இந்தியா

      அவரவர் மனக்குமுறல் அவரவர்க்கு.. சாதாரண ஜுரம், தலைவலி போன்ற உபாதையில் உள்ளவர்கள் சிகிச்சைக்காக டாக்டரை அணுகினால், டெங்கு ஜுரம், எய்ட்ஸ் போன்ற நோயால் பாதித்தவர்களைக்காட்டி ஆறுதல் பட்டுக்கொள்ளச் சொல்லி, சிகிச்சை பெற்றுக்கொள்ள மறுப்பு தெரிவிப்பீர்கள் போல் இருக்கிறதே..?

  • என்னுயிர்தமிழகமே - ameerpet-Hyderabad,இந்தியா

    கொஞ்சம் நிதானமாவே இரு

    • LAX - Trichy,இந்தியா

      இதுவரை..? எதற்காக..? கொலை, கொள்ளை போன்ற குற்றங்களில் ஈடுபாடுபவர்களுக்குக் கூட ஆதரவாக மனித உரிமைகள் என்று வரிந்துகட்டிக்கொண்டு வக்காலத்து வாங்கப்படும்போது..?

கருத்தைப் பதிவு செய்ய

Advertisement