Advertisement

அன்புடன் அந்தரங்கம்!

அன்புள்ள சகோதரிக்கு —
என், வயது, 56; அரசு துறையில் பணிபுரிகிறேன். என் கணவர், மத்திய அரசு ஊழியர். ஒரே மகன்; திருமணமாகி, அமெரிக்காவில் வசிக்கிறான்.
நான், மிகவும் ஏழ்மை குடும்பத்தில் பிறந்தவள். ஒரு தம்பி, இரு தங்கைகள். என், 15வது வயதில், என் தந்தை இறந்து போக, சித்தப்பா வீட்டில் தஞ்சம் அடைந்தோம்.
பதினைந்து வயதான எனக்கு, 'செக்ஸ்' டார்ச்சர் கொடுக்க ஆரம்பித்தார், சித்தப்பா. ஒவ்வொரு நாளும் அதிலிருந்து தப்பிப்பது பெரும்பாடாக இருந்தது. அதனால், அவரிடமிருந்து தப்பிக்கவும், குடும்ப பாரத்தை சுமக்க வேண்டிய கட்டாயத்தினாலும், படிப்பை பாதியில் நிறுத்தி, குறைந்த சம்பளத்தில், தனியார் நிறுவனத்தில்,'டைப்பிஸ்ட்' வேலையில் சேர்ந்தேன்.
பின், தெரிந்தவர் மூலமாக, அரசு அலுவலகம் ஒன்றில், 'டைப்பிஸ்ட்' வேலை கிடைத்தது. சம்பளம் குறைவு தான். இருப்பினும், உடனடியாக சித்தப்பா வீட்டிலிருந்து, தாய், தம்பி, தங்கைகளுடன், தனியாக வாடகைக்கு வீடு பார்த்து சென்றேன். இதனால், கோபமடைந்த சித்தப்பா எங்களை ஒதுக்கினார்.
சில ஆண்டுகளுக்கு பின், அலுவலக தேர்வு எழுதி, சீனியர் கிளார்க்காக பதவி உயர்வு பெற்றேன். அரசு ஒதுக்கீட்டில், குறைந்த வாடகையில், வீடும் கொடுத்தனர். குடும்பம் சற்று தலைநிமிர்ந்தது.
எனக்கு திருமணம் செய்ய, முயற்சி எடுத்தார், அம்மா. நான் வேண்டாம் என்று கூறியும், 'மத்திய அரசு ஊழியர்; ஒரு தம்பி மட்டுமே உள்ளார்; எந்த பிரச்னையும் இல்லை. வரதட்சணை வேண்டாம் என்கின்றனர்...' என்று கூறி, என்னை சம்மதிக்க வைத்தார், அம்மா.
மாப்பிள்ளை வீட்டினரே திருமணத்தை நடத்தினர். முதலிரவு அன்று தான் தெரிந்தது, என் கணவர் ஆண்மையற்றவர் என்பது!
இவ்விஷயம், என் கணவரின் பெற்றோருக்கு தெரிந்திருந்தும் மறைத்து, ஏழையான என்னை தேர்ந்தெடுத்துள்ளனர் என்பதை அறிந்து, நொந்து போனேன்.
விதியை நொந்தபடி, அவருடன் குடும்பம் நடத்த ஆரம்பித்தேன். ஒரு சில ஆண்டுகளில் என் மாமனார் இறக்க, மாமியாரின் கொடுமை தலை தூக்கியது. காலையில், 'பெட்' காபியிலிருந்து டிபன், சாப்பாடு என, அனைத்தும் அவர் இருக்கும் இடத்தில் குறிப்பிட்ட நேரத்தில் சரியாக இருக்க வேண்டும். அத்தனையும் செய்தும், கொடுமையின் உச்சமாக, தன் மகனின் குறையை அறிந்திருந்தும், குழந்தை இல்லை என்று என்னை குறை கூற ஆரம்பித்தார். ஒரு கட்டத்தில், தன் இளைய மகன் மூலமாக குழந்தை பெற்று தர வற்புறுத்தினார். இதைக் கேட்டு துடித்துப் போனேன். இப்போது இருப்பது போல், 'டெஸ்ட் டியூப் பேபி' மருத்துவ முறை அப்போது இல்லை. எப்படியிருந்திருக்கும் என் நிலை யோசித்து பாருங்கள்!
மாமியாரின், 'டார்ச்சர்' ஒருபுறம், மச்சினன் தொல்லை மறுபுறம். என் சம்மதம் இல்லாமலே, 'அந்த' அவலம் அரங்கேற, என் மகன் பிறந்தான். மாமியாருக்கு சந்தோஷம்; என் கணவருக்கு விஷயம் தெரிந்தும், கண்டுகொள்ளவில்லை.
பின், மச்சினனுக்கு திருமணம் முடிந்து, தனியாக சென்று விட்டார். இவ்விஷயம் மச்சினன் மனைவிக்கு தெரியாது.
என மகனை பார்க்கும் போதெல்லாம் குற்ற உணர்வு ஏற்படும். அவன் வளர வளர, அந்த குற்ற உணர்வை மனதில் ஒரு மூலைக்கு தள்ளி வைத்து விட்டேன்.
இதற்கிடையில், என் தம்பி, தங்கைகளின் பட்டப்படிப்பு, வேலை மற்றும் திருமணம் என, அத்தனையும் பார்த்து, அவர்களது வாழ்க்கைக்கும் நல்வழி காட்டி விட்டேன்.
சமீபத்தில் என் தாயாரும், சில ஆண்டுகளுக்கு முன் என் மாமியாரும் இறந்து போயினர்.
இத்தனை காலமும் என் மனதின் ஓரத்தில் இருந்த குற்ற உணர்வு மீண்டும் தலை தூக்க ஆரம்பித்துள்ளது. இதனால், இரவில் தூக்கமின்றி தவிக்கிறேன்.
என் கணவரோ எதையும் கண்டு கொள்வதில்லை. சமைத்து வைத்ததை சாப்பிடுவார்; பின், தன் அறைக்கு சென்று கதவை மூடிக் கொள்வார். அவ்வளவு தான்!
என் சம்பாத்தியத்தில் புறநகரில் மனை ஒன்று வாங்கியுள்ளேன். வங்கியிலும் கணிசமான தொகை உள்ளது. அலுவலகம் செல்லும் நேரம் போக, மற்ற நேரங்களில் என் மனநிலை மிக மோசமாகி கொண்டிருக்கிறது. எவ்வளவு நேரம், 'டிவி' பார்ப்பது, புத்தகம் படிப்பது...
பணி ஓய்வுக்குபின் என் மகனிடமோ, தம்பி, தங்கை குடும்பத்தினருடனோ சென்று தங்குவதை விரும்பவில்லை.
என்னையும் மீறி நடந்த தவறு, என்னை நாளும் கொல்கிறது. இதிலிருந்து விடுபடுவது எப்படி? எதிர்காலத்தை நிம்மதியாக கழிக்க, நல்ல பதில் தருவீர்கள் என்று நம்புகிறேன்.
— இப்படிக்கு
அன்பு சகோதரி.

அன்புள்ள சகோதரிக்கு —
உன் வாழ்க்கை ஒரு துன்பியல் நாடகம்; நீயே உழைத்து, உயர்ந்து, சொந்த காலில் நின்று, தம்பி, தங்கைகளுக்கு சிறப்பான எதிர்காலம் அமைத்து கொடுத்துள்ளாய். ஆண்மையற்றவனை மணந்த போதும், உதறி தள்ளாமல், அவனுடன் தொடர்ந்து குடும்பம் நடத்தியுள்ளாய்.
உன் வாழ்க்கை பக்கங்களை புரட்டி பார்க்கையில், நீ எந்த விஷயத்திலும் குற்றவாளி இல்லை. மகள் முறை சிறுமியிடம் பாலியல் வன்முறையில் ஈடுபட்ட உன் சித்தப்பா முதல் குற்றவாளி; ஆண்மையற்ற மகனுக்கு உன்னை திருமணம் செய்து, உன் வாழ்க்கையை பாழாக்கியதோடு, இளையவனுக்கு உன்னை இரையாக்கிய உன் மாமியார், மிகப் பெரிய குற்றவாளி; அண்ணனின் மனைவியை பலாத்காரம் செய்து, ஒரு குழந்தையை கொடுத்த உன் மைத்துனன் ஒரு குற்றவாளி; தான் ஆண்மையற்றவன் என்ற உண்மை தெரிந்திருந்தும், சுயநலமாக உன்னை மணந்த உன் கணவன் ஒரு குற்றவாளி; இவர்களுக்கு மத்தியில் நீ வெறும் பலியாடு!
நடந்து முடிந்த தவறுக்கு, நீ ஒரு சதவீதம் கூட பொறுப்பாக மாட்டாய். பிரதான குற்றவாளியான உன் மாமியார் இறந்து விட்டார்; உன் மைத்துனனும் திருமணம் செய்து, செட்டிலாகி விட்டான். பாலியல் பலாத்காரத்தில் பிறந்தாலும், உன் கரு முட்டையில் உருவாகி, பத்து மாதம் உன் கருவறையில் இளைப்பாறியவன், உன் மகன். உன் கணவனின் மூதாதையர் மரபியல் அணு, உன் மகனிடமும் உள்ளது. அதனால், உன் மகனை, மைத்துனனின் மகனாய் பாராமல், உன் மகனாக பார்!
தினமும் கண்ணாடி முன் நின்று, 'நான் எந்த தவறும் செய்யவில்லை; அதனால், எவ்வித குற்ற உணர்ச்சியிலும் மூழ்க மாட்டேன்...' என, சுயவசியம் செய். மனம் அமைதியுற, ஆன்மிக சுற்றுலா செல். தம்பி, தங்கை குடும்பத்தினருடன் எப்போதும் இணக்கமாக இரு.
புறநகரில் வாங்கிய மனையில், தோட்டம் அமைத்து, ஆடு, மாடு, கோழி பண்ணை அமை. நேரம் உபயோகரமாய் கழியும். குறைந்தபட்சம், ஆதரவற்ற நான்கு சிறுவர்களுக்கான படிப்பு செலவை, 'ஸ்பான்சர்' செய்.
பாலியல் பலாத்காரத்தால் பாதிக்கப்பட்ட பெண்களை, அதற்குரிய அமைப்புகள் மூலம் கண்டறிந்து, அவர்களுக்கு தேவையான உதவிகளை செய். எல்லாம் இறைவனின் நாடகம் என நினைத்து, அவனிடம் முழு சரணாகதி அடை; வாழ்க்கை பூரணத்துவம் பெறும்.
— என்றென்றும் தாய்மையுடன்
சகுந்தலா கோபிநாத்

Advertisement
 
Outbrain

வாசகர் கருத்து (16)

  • Venkatesh Ram - Dammam,சவுதி அரேபியா

    ஹலோ கிரிதரன் ஸ்ரீனிவாசன்,ரொம்ப புத்திசாலிமாதிரி எழுதாதீங்க. இந்த பெண்மணி தேவயானா அனைத்து விஷயங்களையும் தெளிவாசொல்லியிருக்கிறார்.நீங்க சிபிஐ ஆபிசர் மாதிரி கேக்குற எல்லாத்தயும் கதை எழுதிக்கிட்டிருக்கமுடியாது. ஒருத்தன் ஆண்மையுள்ளவனா இல்லையான்னு முதலிரவுலதான் தெரியும். மலட்டுத்தன்மையுடையவனைத்தான் அவங்களா சொல்லாமத்தெரியாது. தான் ஆம்பளையில்லன்னு யாரு வந்து தானாவே சொல்லுவா. பாவம் ஆறுதலுக்காக வந்தவர்களை நோகடிக்காதிங்க.

  • SivaMaran -

    இது தவறு

  • SINGAM - chennai,இந்தியா

    என்னக்கெனவோ இந்த கில்மா வேலை எல்லாம் நம்ப கட்டுமர கட்சியிடம் வந்ததாகவே தெரிகிறது

  • கதிரழகன், SSLC - சிவகங்கை, TN,இந்தியா

    பஞ்ச பாண்டவர்கள் பாண்டு திருதராட்டிரன் விதுரன் எல்லாரும் இந்த மாதிரி முறை தவறி பொறந்தவுகதான். வமிசம் வளர இப்படி செய்வது தவறில்லைன்னு மனசு சமாதானம் செஞ்சுக்கோங்க. சாமிய வேண்டிக்குங்க. கிருஷ்ண பகவான் தங்கை குந்திக்கு நடக்காததா உங்களுக்கு நடந்திருச்சு? அந்த சாமி உங்களை மன்னிச்சு சமாதானம் கொடுக்கும்.

  • A.Mansoor Ali - Riyadh.Athika.,சவுதி அரேபியா

    சகோதரியே எப்போவோ நடந்து முடித்த ஒன்றை இன்னும் நீங்கள் அசை போட்டு கொண்டு இருபத்து சரி இல்லை...எல்லாம் விதி என கருதி நடந்ததை மறந்து நடக்க போவதை பாரு...நீ சுமந்து பெற்ற பிள்ளை தானே .பிறகு ஏன் அதையே நினைத்து அசை போட்டு கொண்டு இருக்கிறாய்...இதற்க்கு என்ன தான் செய்ய வேண்டும் சொல்..என்ன செய்தால் உன் மனநிலை மாறும் சொல் பார்க்கலாம் ....இனி வரும் காலத்தை எப்படி கொண்டு போவது என்பதை நினைத்து வாழ்ந்து கொள்..மீண்டும் உன் வாழ்க்கையின் பழைய பக்கங்களை திருப்பி பார்க்காதே. எல்லாம் இறைவனின் செயல்..அமைதி படு எல்லாம் சரியாகும் .

  • Muthu - Dubai,ஐக்கிய அரபு நாடுகள்

    குடும்பத்தை விருத்தியாக மாமியார் மற்றும் மைத்துனனின் தொல்லைக்காக அந்த அவலம் நடந்தேறியதாம்...அப்படியே இருந்தாலும் இது என்ன ஒரு முறை ஹோட்டலுக்கு சென்றோம், சாப்பிட்டோம், வயிறு நிறைந்தது போலாலல்லவா உள்ளது......

  • Indhiyan - Chennai,இந்தியா

    நன்றாக புரிந்து கொள்ள வேண்டியது, தாய்மை என்பது தாம்பத்யத்துக்கு அப்புறம்தான் ஆரம்பிக்கிறது. குழந்தை பெறுவதிலும் அதை வளர்ப்பதிலேதான் தாய்மை அதிகம் வெளிப்படுகிறது, யசோதை மாதிரி, வேறு யாரோ இன்னொருவர் குழந்தையாகினும். எனவே பிரசவ வலி முதல், பாலூட்டி, நெஞ்சில் அணைத்து வளர்த்த குழந்தை மகனே, எப்போதும். மஹாபாரதத்தில், பாண்டுவும் திருதராஷ்டிரனும் தன் தன் தந்தையின் சகோதரனான வியாசர் மூலம் பிறந்தவர்கள். வம்சம் வளர அப்படி ஒரு முறை இருந்தது [காமத்தை பொருட்டாக இல்லாமல் வம்ச விருத்திக்காக நிறைய நிபந்தனைக்கு உட்பட்டு]. எனவே, தன் வயிற்றில் பிறந்த பிள்ளை மகனே. குற்ற உணர்ச்சி தேவை இல்லை.

    • SivaMaran - ,

      இந்தவிசையத்தில் கடவுளை கொண்டுவருவது! அந்தகடவுளுக்கேஅடுக்காது?

  • Giridharan Srinivasan - Chennai,இந்தியா

    சகுந்தலா கோபிநாத்திடம் ஆலோசனை கேட்டு உள்ள நபர் நன்றாக பொய் சொல்கிறார் என்று தெரிகிறது. தன்னுடைய பதினைந்து வயதில் தன் சித்தப்பா "செக்ஸ் டார்ச்சர்" கொடுத்த தாகவும் அதில் இருந்து தப்பிப்பதற்காக ]குடும்ப பாரத்தை சுமக்க என்று அவர் எழுதி இருப்பது பொய் என்று தோன்றுகிறது . காரணம் அவர் தன் அம்மா வை பற்றி எதுவுமே எழுதவில்லை.] படிப்பை பாதியில் நிறுத்திவிட்டு "தெரிந்தவர்""?? மூலமாக ஒரு தனியார் நிறுவனத்தில் குறைந்த சம்பளத்தில் டைப்பிஸ்ட் வேளையில் சேர்த்ததாக எழுதி உள்ளார். தன் பதினைந்து வயதில் செக்ஸ் டார்ச்சரில் இருந்து தப்பிக்க தெரிந்த ஒரு பெண்ணுக்கு தன் மச்சினனிடம் தன்னை அறியாமல் உறவு வைத்துக்கொண்டு அதன் மூலம் ஒரு மகன் பிறந்ததாகவும் எழுதி உள்ளார். இது நம்பும்படியாக இல்லை. மேலும் முதலிரவு அன்றைக்கே தன் கணவர் ஆண்மையற்றவன் என்று தனக்கு தெரிந்து விட்டதாக எழுதி உள்ளார். [ "......முதலிரவு அன்று தான் தெரிந்தது" என்று தான் எழுதி உள்ளார். தன் கணவரே தான் ஆண்மையற்றவன் என்று கூறியதாக எழுதவில்லை. இங்கு ஒரு கேள்வி எழுகிறது: இவர் செக்ஸ் பற்றி ஆழ்ந்த அறிவு அல்லது அனுபவம் உள்ளவரா? ] மேலும் இவர் தனக்கு தற்பொழுது ஐம்பத்தாறு வைத்து என்று எழுதி உள்ளார். தனக்கு எத்தனை வயதில் திருமணம் நடந்தது என்று எழுதவில்லை. மேலும் இவர் கூறுவது போல் இவர் கணவர் ஆண்மையற்றவன் என்று வைத்து கொண்டாலும், "டெஸ்ட் டியுப் பேபி" பற்றி எழுதி உள்ளாரே தவிர, ஆண்மைத்தன்மையை தன் கணவருக்கு பெற்று தர சிகிச்சை பெற இவர் என்ன செய்தார் என்பதை பற்றி எதுவும் எழுதவில்லை. [குறிப்பு: ஆண்மைத்தண்மையை பெறுவதற்கான சிகிச்சை பல தலைமுறைகளாக இருப்பதாக விளம்பரங்கள் செய்தி தாள்களிலும், தொலைக்காட்சிலும் வருகின்றன.] இவர் தன் சம்பாத்தியத்தில் புறநகரில் மனை ஒன்று வாங்கியுள்ளேன். வங்கியிலும் கணிசமான தொகை உள்ளது என்று தான் எழுதி இருக்கிறார். இவருடைய கணவரின் சம்பளம் என்ன ஆனது என்று எழுத வில்லை. ஆக மொத்தம் இவர் தன் காம பசியை போக்க தன் பதினைந்து வயதில் இருந்து பார்த்து கொண்டு இருந்திருக்கிறார். அதை தட்டி கேட்ட தன் சித்தப்பாவை காமவெறி பிடித்தவாறாக இங்கு எழுதி உள்ளதாக தெரிகிறது.

    • mukundan - chennai,இந்தியா

      யோவ் வாயில நல்ல வந்துடும். பெரிய டிடெக்ட்டிவ் வந்துட்டாரு. பொண்ணுன்னா வந்துடுவீங்களே வியாக்கியானம் பேசிட்டு. எவனாவது உங்கிட்ட இப்போ கருத்து கேட்டானா?

    • Naduvar - Toronto,கனடா

      கிரிதரன் சொல்வதில் பலஉண்மைகள் உள்ளது தெரிகிறது நானும் அப்படியே நெனைக்கிறேன் இந்த முகுந்தன் போன்றவர்கள் , இந்த பொண்ணை நாம் முன்னமே சந்திக்கவில்லையே என்று ஏங்குபவர்கள். இவர்களை நாம் பொருட்பதுதா தேவையில்லை

    • mukundan - chennai,இந்தியா

      பெண்மையை கேவல படுத்தி பார்க்கும் சில காம வெறியரில் நீயும் ஒன்று.

    • HoustonRaja - Houston,யூ.எஸ்.ஏ

      தனிப்பட்ட தாக்குதல்கள் வேண்டாமே. கிரிதரனின் அபிப்பிராயங்களில் சில நியாயங்கள் இருக்கத்தான் செய்கிறது. இந்த பெண் - ஏதோ தேடுகிறார், ஆனால் அதை அவரால் நேராக சொல்ல முடியவில்லை.. கணவனிடம் இருந்து இவருக்கு நெருக்கமும், அது சார்ந்தவையும் திருமணமானதிலிருந்தே கிடைக்கவில்லை போலும். அதனால், இவர் ஏக்கத்திலும், விரக்தியிலும் உள்ளார். விவாகரத்து (அல்லது, பிரிந்து செல்லும்) முடிவில் இருக்கிறார். புரிதலும், மனதால் அரவணைப்பும், உடல்சார்ந்த நெருக்கமும் - நமக்கு பாதுகாப்பான உணர்வை தருபவை - எனவே இவை அனைவருக்கும் இன்றியமையாதவை. இவற்றை தேடி, இவர் இன்னொரு துணையை நாடும் முன், நன்றாக யோசித்து, தன் கணவரிடமும், மகனிடமும் வெளிப்படையாக பேசி பின் - துணிந்து பிரிந்து செல்ல வேண்டும். நினைத்த வண்ணம் வாழ - ஒரே வாழ்க்கை ஒரே வாய்ப்பு. துணிவே துணை. வாழ்த்துக்கள்.

  • என்னுயிர்தமிழகமே - ameerpet-Hyderabad,இந்தியா

    நீங்க மனதளவில் அதிக காயம் பட்டுள்ளீர்கள், அதனில் இருந்து வெளிவருவது மிக முக்கியம் , இதில் உங்களோட மகன் தப்பு எங்குள்ளது? மேலும் சமைத்து வைத்ததை சாப்பிட்டு ரூமில் அடைந்து கொள்வார் என்று கூறுகிறாய், ஆனால் அவரை வார்த்தையால் கொண்றுவிடுகிறாயா? அன்று மாமியாரும் மைத்துனனும் செய்த கொடுமைக்கு நீயும், மகனும், இன்னமும் காயப்பட்டுக்கொண்டே இருக்க வேண்டுமா??

  • .Dr.A.Joseph - London,இந்தியா

    புதைக்கப்பட்ட உண்மைகளை . போஸ்ட் மார்ட்டம் செய்ய முயலக்கூடாது. நிறைந்த அன்புடன்...............................டாக்டர்.எ.ஜோசப்.லண்டன்

    • Natarajan Ramanathan - chennai,இந்தியா

      நீதான்யா டாக்டர்...................... (இந்த பெண்ணின் மகன் செய்த குற்றம் என்ன? அவனோடு சென்று தங்குவதில் என்ன பிரச்சனை?)

கருத்தைப் பதிவு செய்ய

Advertisement