Advertisement

நம்பிக்கை விதை!

தண்ணீரில்லை
கைகழுவ
வேண்டியது தானா
விவசாயத்தை...?

தண்ணீருக்குள்ளேயே
தவமிருந்தோம்
அது படைப்பியல்!
தண்ணீருக்காக
தவமிருக்கிறோம்
இது அரசியல்!

கதிர் அரிவாள் போலவா
இருக்க வேண்டும்?
கழனித் தொழிலாளியின்
வாழ்க்கை...
கேள்விக்குறியாக...!

எந்தத் தறியில்
யார் நெய்தது?
கந்தல் துணியாகவே
இருக்கிறதே
நெசவாளர்களின்
சொந்த வாழ்க்கை!

எப்படி எங்கள்
வாழ்க்கை மட்டும்
வறண்டே கிடக்கிறது?
இது...
நீரிலேயே நிற்கும்
சலவைத் தொழிலாளியின்
சந்தேகம்?

வலைகளை விடவும்
சல்லடையாயிருக்கிற
வாழ்க்கை மீனவர்களுக்கு!

ஈவுகளை
தீர்மானிப்பது யார்?
உழைப்பாளிகளின்
கணக்குகளின்
வியர்வை விடையாகிறது
வறுமை மீதியாகிறது!

தயங்காதீர்!
ஓடப்பயந்த நதிகளில்
கிருமிகள் வந்து
குடி இருக்கும்!
உயரப் பறந்த நதிகளே
அருவிகள் என்று
பெயர் எடுக்கும்!

நம்புங்கள்!
கண்ணீரை விடவும்
உயர்வானது வியர்வை!
அதனால் தான்
அழுவதைப் போல்
நடிக்க முடிகிறது
வியர்ப்பதை போல்
நடிக்க முடியவில்லை!

முகத்திரி எரிந்தாலும்
முறுவலிக்கும் விளக்குகள்!

மிதிப்பட்டாலும் தம்மை
அலங்கரிக்கும் தரைகள்!

பொங்கும் போது
பூ பூக்கும் பானைகள்!

காயம் பட்டாலும்
இனிக்கும் கரும்புகள்!

நம்பச் சொல்கின்றன நம்மை!
வழி பிறக்கும்...
நடந்து வரும் தையாலும்!
நகத்திலிடும் மையாலும்!

நெல்லை ஜெயந்தா

Advertisement
 
Outbrain

வாசகர் கருத்து

    முதல் நபராக கருத்து தெரிவியுங்கள்!

கருத்தைப் பதிவு செய்ய

Advertisement