Advertisement

உறையூர் குழுமாயி கோவில் குட்டிக்குடி விழா: குவிந்த பக்தர்கள்

திருச்சி: புத்தூர் குழுமாயி அம்மன் கோவிலில், பிரசித்திப்பெற்ற, குட்டிக்குடி திருவிழாவில், பலி கொடுக்கப்பட்ட, நூற்றுக்கணக்கான ஆடுகளின் ரத்தத்தை மருளாளி குடித்தார்.

திருச்சி உய்யக்கொண்டான், கோரையாறு, குடமுருட்டி ஆகிய, மூன்று ஆறுகள் சங்கமிக்கும், ஆறுகண் கலிங்கி அருகே, புத்தூர் குழுமாயி அம்மன் கோவில் அமைந்துள்ளது. வரலாற்று சிறப்புமிக்க அம்மன் கோவிலில் ஆண்டுதோறும் நடக்கும், ‘குட்டிக்குடித்தல் திருவிழா பிரசித்திப்பெற்றது. நடப்பாண்டு குட்டிகுடி திருவிழா கடந்த 26ம் தேதி இரவு காப்பு கட்டுதல் நிகழ்ச்சியுடன் துவங்கியது. விழாவில், நேற்றுமுன்தினம் (6ம் தேதி) தேதி இரவு, காளி ஓட்டத்தையொட்டி, வண்ணாரப்பேட்டையிலிருந்து தப்பு, தாரை, தப்பட்டையுடன் ஊர்வலமாக புறப்பட்டு, நள்ளிரவில் அம்மனை அழைத்து வந்து பதுவு கோவிலில் வைத்தனர். அதைத்தொடர்ந்து, அம்மன் காளி ஓட்டமாக, தென்னை ஓலை, வெட்டிவேர் கொண்டு அலங்கரிக்கப்பட்ட ரதத்தில், நேற்று முன்தினம் இரவு, வீதியுலா வந்தார். உறையூர், புத்தூர், தென்னூர் பகுதியில் வீதி, வீதியாக உலா வந்த அம்மனுக்கு சுத்தபூஜை என்பதால், வீடுகள் தோறும், தேங்காய், பழம் வைத்து பூஜை செய்தனர். விழாவின் முக்கிய நிகழ்வான, ‘குட்டிக்குடித்தல் வைபவம், இன்று (மார்.,8) புத்தூர் மந்தையில் நடந்தது. காளி ஓட்டமாக வந்த அம்மனின் முன்னிலையில், தாரை, தப்பட்டை, உடுக்கு அடித்து மருளாளிக்கு அருள் வர வைத்தனர். மருளாளி அருள் வந்து, பலி கொடுத்த ஆடுகளின் ரத்தத்தை குடித்தார். நூற்றுக்கணக்கான ஆடுகளின் ரத்தத்தை, மருளாளி ஆவேசமாக குடிப்பது, காண்போரின் ரத்தத்தை உறைய வைத்தது. நூற்றுக்கணக்கான ஆடுகள் வெட்டப்பட்டதால், அப்பகுதி முழுவதும் ரத்த சகதியாக காட்சியளித்தது. பல்லாயிரக்கணக்கான பக்தர்கள் மந்தையில் திரண்டதால், உறையூர், புத்தூர், தென்னூர் பகுதிகளில், ராட்டினம், சாலையோர கடைகள் என திருவிழா கோலம் பூண்டன.

Advertisement
 
Outbrain
Advertisement