Advertisement

சொல்கிறார்கள்

உடலுழைப்பால்பருமனிலிருந்துதப்பலாம்!

உடல் பருமன் பிரச்னையிலிருந்து குழந்தையை காப்பாற்ற வழி கூறும், பொது நல மருத்துவர்,
அருணாசலம்:

குழந்தைகள் பருமனாய் இருப்பதற்கு, பரம்பரையும் ஒரு காரணம். இருப்பினும், உணவுப் பழக்கம் மற்றும் உடல் உழைப்பு இல்லாமையே, பிரதான காரணமாக கூறப்படுகிறது. அதே நேரத்தில் குண்டாக இருக்கும் பரம்பரையை சேர்ந்தவரும், சிறுவயது முதலே உணவுக் கட்டுப்பாடு, விளையாட்டு போன்ற உடலுழைப்பு மூலம், பருமன் ஏற்படாமல் தப்பலாம்.

பிறந்த குழந்தைகள் பொதுவாக, 2.5 - 3 கிலோ என்ற, சராசரி எடையுடன் இருப்பர். மாதம், 500 - 600 கிராம் அளவில், எடை அதிகரித்து வரும். மொத்தமாக, 6 - 7 கிலோ எடை கூடி, ஒரு வயது பூர்த்தியாகும் போது, 10 - 12.5 கிலோ வரை இருப்பது ஆரோக்கியமானது. அதன்பின், 'பாடி மாஸ் இண்டெக்ஸ்' எனப்படும், பருமனை அளவிடும் முறையில் அளவிடலாம்.

பி.எம்.ஐ., அளவீடு, 18க்கு குறைவாக இருந்தால், உடல் எடை குறைவு; 18 - 25.9க்குள் இருந்தால், ஆரோக்கியமான எடை; 25 - 29.9 எனில், அதிகப்படியான எடை; 30 - 34.9 எனில், உடல் பருமன்; 35 - 39.9 எனில், அதிக உடல் பருமன்; 40க்கும் மேல் இருந்தால், தீவிரமான உடல் பருமன் என, எடுத்துக் கொள்ள வேண்டும்.

பருமன் பிரச்னையால் பாதிக்கப்படாமல் இருக்க, குழந்தை பிறந்ததில் இருந்தே, கட்டுப்பாட்டை ஆரம்பிக்க வேண்டும். குழந்தைகள் போதும் என்ற பிறகும், கட்டாயப்படுத்தி உணவு ஊட்டக் கூடாது. குழந்தைகள் மிகவும் குண்டாக இருப்பதாக உணர்ந்தால், உணவில் காய்கறி, பழங்களை அதிகமாக கொடுத்து, நொறுக்குத் தீனிகளை குறைக்க வேண்டும். எண்ணெய், நெய்யை அளவுடன் சேர்க்க வேண்டும்.

தொலைக்காட்சி பார்த்தபடியோ, வேறு ஏதாவதில் கவனம் செலுத்தியபடியோ சாப்பிடுவதை தவிர்க்க வேண்டும். ஏனெனில், எவ்வளவு சாப்பிடுகிறோம் என தெரியாமல், உண்ணும் உணவின் அளவு, அதிகமாக வாய்ப்புண்டு.குழந்தைகள் தொந்தரவு தருவதைத் தவிர்க்க வேண்டும் என, மொபைல் போன், கம்ப்யூட்டர் கொடுத்து விளையாடுவதை ஊக்கப்படுத்தக் கூடாது.
அப்படிச் செய்தால், வெளியே சென்று விளையாடும் ஆர்வம் குறைந்துவிடும். தினசரி சைக்கிள் ஓட்டுதல், நீச்சல் பயிற்சி போன்றவை சிறந்த உடற்பயிற்சிகள்; வாரம் ஒரு முறையாவது இவற்றை மேற்கொள்ள ஊக்குவிக்க வேண்டும்.

பிள்ளைகளின் எதிர்காலம் சிறக்க, கல்வி மட்டுமே அல்ல, உடல் நலனும் முக்கியம் என்பதை உணர்ந்து, கிரிக்கெட் அல்லது, 'டென்னிஸ் கிளப்'பில் சேர்க்கலாம். அவர்களுக்கு ஆர்வமிருந்தால் கராத்தே, சிலம்பாட்டம் போன்ற தற்காப்புக் கலை வகுப்புகளிலும் சேர்க்கலாம்.பொதுவாக, உணவில், 60 - 65 சதவீதம் கார்போஹைட்ரேட், 20 - 25 சதவீதம் புரோட்டீன், 10 சதவீதம் கொழுப்பு, 5 சதவீதம் தாதுச் சத்து இருக்குமாறு பார்த்துக் கொள்ள வேண்டும்.

காலை, 6:00 மணிக்கு, தண்ணீர் குடித்த பின், பால் சேர்க்காத தேநீர் அல்லது பழச்சாறு; 8:00 மணிக்கு, டிபன்; முற்பகல், 11:00 மணிக்கு, மோர், தேநீர் போன்ற நீராகாரம், புரூட் சாலட்.
பகல், 1:00 மணிக்கு, சாப்பாடு; மாலை, 4:00 மணிக்கு, சிற்றுண்டி - பயறு வகைகள், தேநீர் அல்லது நீராகாரம்; இரவு, 8:00 மணிக்கு டிபன்; இரவு, 9:00 மணிக்கு பால்.இப்படிச் சிறுகச் சிறுக சாப்பிடுவதால், பசி அதிகமாக எடுக்காது; உடலில் தேவைக்கு அதிகமான குளூக்கோஸ் சேராது. அவை கொழுப்பு சத்தாக மாற்றப்பட்டு சேமிக்க வாய்ப்பின்றி, எடை அதிகரிக்காமல் இருக்கும்.

Advertisement
 
Outbrain

வாசகர் கருத்து

    முதல் நபராக கருத்து தெரிவியுங்கள்!

கருத்தைப் பதிவு செய்ய

Advertisement