Advertisement

சிங்கப்பூரில் முத்தமிழ் விழா

சிங்கப்பூர் : தமிழ் மொழி விழாவையொட்டி , சிங்கப்பூர் தமிழ் எழுத்தாளர் கழகம் , தனது முத்திரைத் திருவிழாவாக , முத்தமிழ் விழாவை , ஏப்ரல் 7 ஆம் தேதி , உமறுப் புலவர் தமிழ் மொழி நிலைய அரங்கில் கோலாகலமாக நடத்தியது. நடனம் ,சிறார்களின் மாறு வேடப் போட்டி, மாணவர் பேச்சுத் திறன் ,தமிழவேள் விருது , பார்வையாளர்களுக்குப் புதிர்ப் போட்டி, சிறப்புரை என பல்சுவை அங்கங்கள் நிறைந்து அரங்கமே அதிரும் வண்ணம் நிகழ்ச்சிகள் நடை பெற்றன.மூத்த நாடாளு மன்றச் செயலாளர் முகமது ஃபைஷல் இப்ராஹிம் சிறப்பு விருந்தினராகக் கலந்து கொண்டு சிறப்பித்தார்.மாணவியரின் குறள் நடனமும் , சிறார்களின் மாறுவேடக் காட்சிகளும் பார்வையாளரை அசத்தின. முத்தாய்ப்பு நிகழ்வாக இவ்வாண்டுக்கான தமிழவேள் விருது அறிவிக்கப்பட்டது . சிங்கப்பூரின் மூத்த நாடக கலைஞர் , கவிஞர், நூலாசிரியர் , கலைச்செம்மல் விருது பெற்ற ச.வரதன் தமிழவேள் விருதாளராகப் பலத்த கரவொலிக்கிடையே அறிவிக்கப்பட்டார். அவருக்கு நான்கு சவரன் பொற்பதக்கம், பொன்னாடை , மாலை அணிவித்து சிறப்பு விருந்தினர் கவுரவித்தார்.

பேச்சுத் திறன் போட்டியில் மாணவர்கள் பேசி மகிழ்வூட்டினர்.பேச்சுப் போட்டியில் வெற்றி பெற்ற மாணவி ரியோனா அமல்ராஜ் தனது திறமையை வெளிப்படுத்தினார் .பிரசாந்த் குமார்- மதுவந்தி ஆகியோர் புதிர்ப்போட்டி நடத்தினர்.சிறு கதைப் போட்டி, குழந்தைகளுக்கான பாடல் போட்டி வெற்றியாளர்கள், சிறுகதையில் மணிமாலா ,கலைவாணி,அரசு நித்யா ஆகியோர் பரிசு பெற்றனர் . பாடல் போட்டியில் தவமணி,கோ.இளங்கோ,அழகு நிலா ஆகியோர் பரிசு பெற்றனர்.நிறைவாக, தமிழகத்தைச் சேர்ந்த திரைப்பட, ஆவணப்பட இயக்குனர் பாரதி கிருஷ்ண குமார் ,” எய்த விரும்பியதை எய்தலாம்” என்ற தலைப்பில் சிறப்புரை ஆற்றினார் . கழகத் தலைவர் ஆண்டியப்பன் தலைமை ஏற்றார். விருது பெற்ற கலைஞர் வரதன் தக்க வகையில் ஏற்புரை ஆற்றினார். செயலாளர் சுப. அருணாசலம் - மெய்யம்மை பெரியண்ணன் ஆகியோர் நிகழ்வினைத் தொய்வின்றி சுவைபட நெறிப்படுத்தினர். துணைச் செயலாளர் கிருத்திகா நன்றி நவில விழா இனிதே நிறைவு பெற்றது.
- நமது செய்தியாளர் வெ.புருஷோத்தமன்

Advertisement
 

வாசகர் கருத்து

    முதல் நபராக கருத்து தெரிவியுங்கள்!

கருத்தைப் பதிவு செய்ய

Advertisement