Advertisement

ஒரே சமயத்தில் தேர்தல் நடத்த கூடுதல் செலவு ரூ.4,555 கோடி! சட்ட அமைச்சகத்திற்கு தேர்தல் கமிஷன் பதில்

புதுடில்லி : 'ஒரு நாடு; ஒரு தேர்தல்' திட்டத்தை செயல்படுத்துவது தொடர்பாக, தேர்தல் கமிஷனிடம், பல்வேறு கேள்விகளை மத்திய அரசு கேட்டுள்ளது. இதற்கு பதில் அளித்துள்ள தேர்தல் கமிஷன், 'இத்திட்டத்தை நிறைவேற்ற, கூடுதல் ஓட்டு இயந்திரங்கள், ஓட்டு போட்டதற்கான ஒப்புகை சீட்டு வழங்கும் இயந்திரங்களுக்காக, 4,555 கோடி ரூபாய் தேவை' என, தெரிவித்துள்ளது.


'நாடு முழுவதும், லோக்சபாவுடன், மாநிலங் களின் சட்டசபைகளுக்கும் சேர்த்து, ஒரே சமயத்தில் தேர்தல் நடத்தப்பட வேண்டும். 'அதனால், மக்கள் பணம் வீணாவது தடுக்கப்படும்' என, பிரதமர் நரேந்திர மோடி வலியுறுத்தி வருகிறார்.


அடுத்த ஆண்டு லோக்சபா தேர்தல் நடக்கவுள்ள நிலையில், 'ஒரு நாடு; ஒரு தேர்தல்' கருத்து வலுப்பெற்று வருவதால், அது தொடர்பாக பிற கட்சிகளின் கருத்தை, சட்ட கமிஷன் சமீபத்தில் கேட்டறிந்தது. இதற்கிடையே, மத்திய சட்ட அமைச்சகம், இந்த திட்டத்தை அமல்படுத்துவது தொடர்பாக பல்வேறு சந்தேகங்களை கேள்விகளாக்கி, பட்டியல் தயாரித்துள்ளது.


இது, சட்ட கமிஷனுக்கு அனுப்பி வைக்கப்பட்டுள்ளது. அதன் தொடர்ச்சியாக, தேர்தல் கமிஷனுக்கும் கேள்வி பட்டியல் அனுப்பி
வைக்கப்பட்டு உள்ளது; இதற்கு, தேர்தல் கமிஷன் அளித்துள்ள பதில் விபரம்:


தற்போதுள்ள நிலவரப்படி, பழுதடைந்துள்ள, 71 சதவீத ஓட்டுப் பதிவு இயந்திரங்கள், 25 சதவீத, கட்டுப்பாட்டு சாதனங்கள், ஓட்டு போட்டதற்கான ஒப்புகை சீட்டு அளிக்கும் இயந்திரங்களில், 35 சதவீதம் மாற்றப்பட வேண்டும். குறைந்தபட்ச தேவையாக, ஓட்டுப் பதிவு இயந்திரங்கள், 36 லட்சத்துக்கு மேல் தேவைப்படுகின்றன. கட்டுப்பாட்டு சாதனங்கள் 26 லட்சத்துக்கும் அதிகமாக தேவைப்படுகின்றன.


ஓட்டு போட்டதற்கான ஒப்புகை சீட்டு அளிக்கும் இயந்திரங்கள், 28 லட்சத்துக்கும் அதிகமாக வாங்கப்பட வேண்டும். ஒரே சமயத்தில் தேர்தல் நடத்த, ஒவ்வொரு ஓட்டுச் சாவடிக்கும், இரு ஜோடி, மின்னணு ஓட்டு இயந்திரங்கள் தேவை.


இதனால், கூடுதலாக, 12.9 லட்சம் ஓட்டு இயந்திரங்கள், 9.4 லட்சம் கட்டுப்பாட்டு சாதனங்கள், 12.3 லட்சம் ஒப்புகை சீட்டு இயந்திரங்கள் கொள்முதல் செய்யப்பட வேண்டும்.


இதற்கு, கூடுதலாக, 4,555 கோடி ரூபாய் செலவாகும். இந்த இயந்திரங்களை வைத்து, 15 ஆண்டுகள், அதாவது, 2034 வரை, ஒரே சமயத்தில் தேர்தல் நடத்த முடியும். அதன்பின், ஓட்டுப் பதிவு தொடர்பான அனைத்து இயந்திரங்களும் புதிதாக வாங்கப்பட வேண்டும்.


ஒவ்வொரு தேர்தலின் போதும், 15 சதவீதம் கூடுதல் ஓட்டுச் சாவடிகள் அமைக்கப்படும் சூழ்நிலை இருக்கும். வாக்காளர்கள் எண்ணிக்கை அதிகரிப்பு, தொகுதிகள் எண்ணிக்கை அதிகரிப்பு போன்ற காரணங்களை வைத்து, இது கணிக்கப்பட்டுள்ளது. இவ்வாறு தேர்தல் கமிஷன் கூறியுள்ளது.


கூடுதல் ஓட்டுச்சாவடி! வரும், 2019ல், ஒரே சமயத்தில் அனைத்து தேர்தல்களும் நடத்தப்பட்டால், 14 சதவீத ஓட்டுச் சாவடிகள் கூடுதலாக அமைக்கப்பட வேண்டும் என, எதிர்பார்க்கப்படுகிறது. 2024ல், இரண்டாம் முறையாக, ஒரே சமயத்தில் தேர்தல் நடத்தப்படும்போது, 12.1 லட்சம் ஓட்டுச் சாவடிகள் கூடுதலாக அமைக்கப்பட வேண்டும் என, தேர்தல் கமிஷன் கூறியுள்ளது. வரும், 2024ல், ஒரே சமயத்தில் தேர்தல் நடத்த, கூடுதல் ஓட்டு இயந்திரங்கள், ஒப்புகை சீட்டு இயந்திரங்கள் வாங்க, 1,751 கோடி ரூபாய் தேவை என கணக்கிடப்பட்டுள்ளது. மூன்றாம் முறையாக, 2029ல், ஒரே சமயத்தில் தேர்தல் நடத்தப்படும்போது, ஓட்டு இயந்திரங்கள், ஒப்புகை சீட்டு இயந்திரங்கள் வாங்க, கூடுதலாக, 2,015 கோடி ரூபாய் தேவைப்படும் என்றும் தேர்தல் கமிஷன் கூறியுள்ளது. வரும், 2034ல் நடக்கும் தேர்தலுக்கு, 13 ஆயிரத்து, 982 கோடி ரூபாய் செலவாகும் என, எதிர்பார்க்கப்படுகிறது. இதில், இயந்திரங்களை எடுத்து செல்வதற்கான போக்குவரத்து, பராமரிப்பு, பாதுகாப்பு செலவினங்கள் சேர்க்கப்படவில்லை.

சிறந்த மாற்று வழி! 'ஒரே சமயத்தில் தேர்தல் நடத்துவதால், பணம் மிச்சமாகுமா?' என்ற, சட்ட அமைச்சகத்தின் கேள்விக்கு, 'புதிய இயந்திரங்கள் வாங்குவதால், கூடுதல் செலவாகும்; தேர்தலுக்கு பின், இந்த இயந்திரங்களை பாதுகாத்து வைப்பதற்கான செலவும் ஏற்படும்' என, தேர்தல் கமிஷன் பதில் அளித்து உள்ளது. அதேசமயம், 'ஒரே ஆண்டில் பல தேர்தல்கள் நடத்தப்படுவதை தவிர்க்க, குறிப்பிட்ட ஒரு ஆண்டில், குறிப்பிட்ட ஒரு சமயத்தில் தேர்தல்களை நடத்துவது, சிறந்த மாற்று வழியாக இருக்கும்' என, தேர்தல் கமிஷன் கூறியுள்ளது.
Advertisement
 

வாசகர் கருத்து (10)

  • தமிழ் மைந்தன் - Dindigul India,இந்தியா

    எப்படி தேர்தல் நடத்தினாலும் மதுரை போன்ற நகரங்களில் அரசியல் கட்சிகளின் மிரட்டளுக்கு பயப்படுவது இயற்கை. எனவே பலர் தங்களின் ஆதங்கத்தை வெளிப்படுத்த முடியாமல் தவிக்கின்றனர். மத்திய மற்றும் மாநில அரசுகளே நடவடிக்கை எடுங்கள்

  • Navasudeen - covai,இந்தியா

    ஒரு சில மாசத்திலே உட்கட்சிகளின் சதி பிரச்சனையில் ஆட்சிகவிழ்ந்தால் கவர்னர்மூலம் ஆட்சி ரெடி

  • Srinivasan Kannaiya - muscat ,ஓமன்

    இரண்டு தபா நடத்தினால் இதை விட குறைவாக வருமா... கள்ள ஓட்டுகள் குறையுமே ...?

  • தேச நேசன் - Chennai,இந்தியா

    ஒவ்வொரு ஆண்டும் நாடுமுழுவதும் பருவநிலை ஓரளவு நன்றாக இருக்கும் காலத்தில் அதற்கு முன்பும் பின்பும் ஆறுமாதங்கள் நடக்கவேண்டிய எல்லாத் தேர்தல்களையும் ஒன்றாக நடத்தலாம் .நமது பொருளாதாரத்தின் அளவைப் பார்க்கையில் ஓட்டு இயந்திரங்களில் செலவழிப்பது குறைவே அது ஜனநாயகத்திற்கான முதலீடே செலவல்ல ..சொல்லப்போனால் இன்னும் ஐம்பதாண்டுகளானாலும் உள்ளாட்சி , லோக்சபா மற்றும் சட்டசபைகளின் கடமை பொறுப்பு & அதிகாரங்களைப்பற்றி மக்ககளுக்கு புரியப்போவதில்லை இவை ஒவ்வொன்றும் வெவ்வேறு என்பதை புரியவைக்கவும் எந்தக்கட்சியும் முயல்வதில்லை

  • Madurai K.சிவகுமார் - Madurai,இந்தியா

    ஒருவேளை, ஏதாவது ஒரு மாநிலத்தில், உட்கட்சி பிரச்சனையால் ஒரு அரசு கவிழ்ந்துவிட்டால், முழு இந்தியாவிற்கும் தேர்தல் நடக்கவேண்டியது இருக்குமோ? அப்படி நடந்தால் அதனால் வரும் விளைவுகள், செலவுகள் இதை பற்றி...........

  • Kasimani Baskaran - Singapore,சிங்கப்பூர்

    உள்ளூரில் - அதுவும் அரசாங்க நிறுவனம் தயாரிப்பதால் - பலருக்கு வேலை வாய்ப்பு உருவாகும்... ஆகவே ஒரு நேரத்தில் தேர்தல் நடத்தி அரசியலை ஒரு முழு நேர தொழிலாக வைத்து இருப்பவர்கள் வேறு வேலை பார்க்க வழிசெய்யவேண்டும்...

  • ஜெய்ஹிந்த்புரம் - மதுரை,இந்தியா

    பண நோட்டை செல்லாதது ஆக்கினால் பொருளாதாரம் பிச்சிக்கும்ன்னு சொன்னது போலத்தான், ஒரே நாடு, ஒரே தேர்தல்னு சொல்றதும், அதனால் செலவு குறையும்னு சொல்றதும்.. இப்பவும் அம்புட்டு மெஷினையும் தேவையில்லாமல் வாங்குவதற்கு மட்டுமே இந்த அறிவாளிகள் கணக்கு போட்டிருக்கிறார்கள். அந்த பல லட்சம் இயந்திரங்களை பாதுகாப்பாக வைக்க பாதுகாப்பு அறைகள், காவல், இத்தியாதின்னு மாதாமாதம் வரும் நிர்வாக, பராமரிப்பு செலவுகளை பற்றி கவலைப்பட்டதாக தெரியவில்லை. இத பக்கோடா பொருளாதார விஞ்ஞானிகளுக்கு விளக்கணும்னா கொஞ்சம் கஷ்டம் தான்.

  • காவிகள் (மாட்டு) மூத்திரம். - cuddalore,இந்தியா

    என்னது மோடி அரசின் விளம்பர செலவுடன் குறைவு தான்.

  • அன்பு - தஞ்சை,இந்தியா

    ஒரு ஆண்டில் ஒரு சமயத்தில் பல மாநில தேர்தல்களை நடத்துவது சாத்தியமான கோரிக்கை. ஆனால் லோக்சபாவிற்கும், சட்டசபைக்கு ஒரே நேரத்தில் தேர்தல் என்பது கேலிக்கூத்து.

கருத்தைப் பதிவு செய்ய

Advertisement