Advertisement

ஊழல் துணைவேந்தருக்கு 5 நாள் போலீஸ் காவல்

கோவை : லஞ்சம் வாங்கிய வழக்கில் கைதான, துணை வேந்தரை தொடர்ந்து ஐந்து நாட்கள் போலீஸ் காவலில் விசாரிக்க கோர்ட் அனுமதி அளித்தது.

கோவை பாரதியார் பல்கலை கழக துணை வேந்தர் கணபதி, 67, வேதியியல் துறை பேராசிரியர் தர்மராஜ், 54, ஆகியோர், உதவி பேராசிரியர் பணியிடத்துக்கு, 30 லட்சம் ரூபாய் லஞ்சம் வாங்கிய வழக்கில், கடந்த, 3ல், லஞ்ச ஒழிப்பு போலீசாரால் கைது செய்யப்பட்டு, சிறையில் அடைக்கப்பட்டனர்.

துணை வேந்தர் கணபதியை, ஐந்து நாட்கள் போலீஸ் காவலில் வைத்து விசாரிக்க அனுமதி கேட்டு, லஞ்ச ஒழிப்பு சிறப்பு கோர்ட்டில் தாக்கல் செய்த மனு, நீதிபதி, ஜான்மினோ முன்னிலையில் நேற்று விசாரணைக்கு வந்தது.

அப்போது நீதிபதி, ''உங்களை போலீஸ் காவலில் விசாரிக்க அனுமதி கேட்டுள்ளனர். என்ன சொல்கிறீர்கள்?'' என்று துணைவேந்தரிடம் கேட்டார். ''போலீஸ் காவலில் செல்ல விரும்பவில்லை,'' என, துணைவேந்தர் பதில் அளித்தார்.

விபரம் தெரிய வரும்



தொடர்ந்து, லஞ்ச ஒழிப்பு போலீஸ் தரப்பில் அரசு வக்கீல் சிவக்குமார் வாதிட்டதாவது: லஞ்சப்பணம் ஒரு லட்சம் ரொக்கத்துடன், நான்கு காசோலைகளை பெற்றுள்ளார்.
இது பற்றி பல முறை விசாரித்தும், எதிரி வாய் திறக்க மறுக்கிறார். 'கஸ்டடி' எடுத்து விசாரித்தால் மட்டுமே, காசோலை நிலை பற்றிய விபரம் தெரிய வரும். உதவி பேராசிரியருக்கான பணி நிரந்தரம், பணி வரன்முறை மற்றும் இதர தொடர்பு பற்றியும் விசாரிக்க வேண்டியிருக்கிறது. காசோலையை கைப்பற்றாவிட்டால், வழக்கு விசாரணை தன்மை பாதிக்கப்படும்.

துணை வேந்தரிடம் விசாரித்த போது, 'காசோலையை வாங்கவில்லை' என்று அவர் கூறவில்லை; 'எங்கே வைத்தேன் என்று தெரியவில்லை' என்று கூறியிருக்கிறார். அப்படியானால், அவர் காசோலையை வாங்கியது உறுதியாகிறது. காசோலையை கைப்பற்ற போலீஸ், 'கஸ்டடி'க்கு அனுமதிக்க வேண்டும்.

திசைதிருப்பும்



எதிர்தரப்பு வக்கீல் ஞானபாரதி வாதிட்டதாவது:போலீஸ் காவலில் விசாரிக்க அனுமதி கேட்டு, போலீசார் தாக்கல் செய்துள்ள பிரமாண பத்திரத்தில், குறைபாடுகள் உள்ளன. போலீஸ் காவல் கேட்டு தாக்கல் செய்துள்ள மனுவில், சட்டப்பிரிவையே தவறாக குறிப்பிட்டுள்ளனர்.

இதை வைத்தே மனுவை நிராகரிக்கலாம்.அவரிடம், 16 மணிநேரம் வீட்டில் வைத்து விசாரித்தும், காசோலையை கைப்பற்றவில்லை. பிரமாண பத்திரத்தில் காசோலை பற்றியும், போலீஸ் காவலுக்கான அவசிய தேவை பற்றியும் எதுவும் குறிப்பிடவில்லை.

போலீஸ் காவல் கொடுத்தால், புதிதாக ஆவணங்களை ஜோடிக்கும் வாய்ப்புள்ளது. காசோலை எண், வங்கியின் பெயர் எதுவும் குறிப்பிடவில்லை.மேற்கொண்டு விசாரிக்க வேண்டியதன் அவசியம் குறித்து எதுவும் மனுவில் குறிப்பிடவில்லை. நீதிமன்றத்தை திசைதிருப்பும் நோக்கத்தில் போலீசார் மனு தாக்கல் செய்துள்ளனர்.இவ்வாறு எதிர்தரப்பு வக்கீல் கூறியபோது, அரசு வக்கீல் குறுக்கிட்டு, கடும் ஆட்சேபம் தெரிவித்தார்.

''இது லஞ்சம் வாங்கி, பொறுக்கித் தின்னதாக போடப்பட்ட வழக்கு. நீதிமன்றத்தை திசை திரும்பும் அவசியம் எங்களுக்கு இல்லை,'' என்றார்.குறுக்கிட்ட நீதிபதி,''நீதிமன்றத்தை திசை திருப்ப முடியாது,'' என்றார்

இதற்கு பதில் அளித்த எதிர்தரப்பு வக்கீல், ''நீதிமன்றத்தை திசை திருப்புவதாக கூறவில்லை. விசாரணை அதிகாரிகளை தான் கூறினேன்,'' என்றார்.அனுமதிக்க வேண்டும் தொடர்ந்து அரசு வக்கீல் வாதிடுகையில், ''லஞ்சம் வாங்கிய ரூபாய் நோட்டுக்களின் எண், காசோலை எண், வங்கி பெயர் உள்ளிட்ட விபரங்களை, முன் கூட்டியே நீதிமன்றத்துக்கு அனுப்பிய மனுவில்குறிப்பிட்டுள்ளோம்.

'காசோலையை எங்கே வச்சிருக்கேன் என்று தெரியவில்லை' என, போலீசில் எதிரி கூறியிருக்கிறார்.''கோர்ட்டில் ஆஜர்படுத்தும்போது, அவர் சொன்னதை மறுக்கவில்லை. எனவே, காசோலையை கைப்பற்றவும், வழக்கு தொடர்பாக மேலும் விசாரிக்க வேண்டியும், போலீஸ்கஸ்டடிக்கு அனுமதிக்க வேண்டும்,'' என்றார்.

அமைதியாக சென்றார்



இரு தரப்பு வாதங்களை கேட்ட நீதிபதி, துணைவேந்தர் கணபதியை, வரும், 16 வரை, ஐந்து நாட்கள் போலீஸ் காவலில் வைத்து விசாரிக்க அனுமதியளித்தார். துப்பாக்கி ஏந்திய போலீசார் பாதுகாப்புடன், துணை வேந்தர் விசாரணைக்கு அழைத்து செல்லப்பட்டார்.

'திருவாசகம்' படிக்கும் கணபதி



துணை வேந்தர் கணபதியை கோர்ட்டிற்கு அழைத்து வந்த போது, அவரது கையில், மாணிக்கவாசகர் எழுதிய, 'திருவாசகம்' என்ற புத்தகத்தை வைத்திருந்தார். கடந்த, 9ல், கோர்ட்டிற்கு அழைத்து வரப்பட்டபோது, நிருபர்களை பார்த்து ஆவேசமாக பேசிய அவர், நேற்று எதுவும் பேசாமல் அமைதியாக சென்றார். இறுக்கமான முகத்துடன் காணப்பட்டார். நீதிமன்றத்தில் நடந்த இரு தரப்பு வக்கீல் வாதங்களை, துணை வேந்தரின் மகன் உன்னிப்பாக கவனித்தார்.

Advertisement
 

வாசகர் கருத்து (19)

  • Vivek Anandan - Singapore,சிங்கப்பூர்

    GOOD NEWS, ACTION WILL START INTERESTING S WILL COME SOON

  • Saai sundaramurthy. A.V.K - chennai,இந்தியா

    லஞ்சம் கொடுத்து வேலை வாங்கியவர்களையும் கைது செய்து தண்டிக்க வேண்டும். ஏனெனில், லட்சக்கணக்கில் பரிமாற்றம் நடந்திருக்கிறது. இப்பொழுதெல்லாம், மக்களே லஞ்சம் வாங்கிக்கொண்டு ஒட்டு போடா ஆரம்பித்து விட்டார்கள்.

  • christ - chennai,இந்தியா

    நாட்டையே அரித்து விடும் இவனை போன்று மக்களின் ரத்தத்தை அட்டை போல உறிஞ்சி குடிக்கும் லஞ்ச பேய்களால்

  • Middle class Madhavan - Chennai,இந்தியா

    திரு ராதாகிருஷ்ணன் அவர்கள் நேற்று பாரதியார் பல்கலை வெப்சைட்டில் ஆய்வு செய்து சொன்னது அனைத்தும் உண்மை. தகுதி வாய்ந்த ஒருவர் கூட முதுகலை மற்றும் ஆராய்ச்சி சார்ந்த துறைகளில் நியமிக்கப்படவில்லை. பணம் கொடுத்தவர்களை மட்டும் கண்ணை மூடிக்கொண்டு நியமித்துள்ளார் துணை வேந்தர் கணபதி. இன்னும் சிலரது பெயர்கள் வெப்சைட்டில் கூட இடம்பெறவில்லை. உதாரணத்திற்கு பி.ஹச் டி முடிக்காத திருமதி கவிதா எந்த வகையில் ஆராய்ச்சி துறைக்கு சிறந்தவர் என்பது ஆச்சர்யம். பெரும்பாலான பேராசிரியர்கள் பி ஹச் டி யை பகுதி நேர முறையில் முடித்தவர்கள். இவர்களில் ஒருவர் கூட ஒரு சிறந்த ஆராய்ச்சி கட்டுரையை இன்டர்நேஷனல் இதழில் தனது பி ஹச் டி யில் பிரசுரிக்க முடியாதபோது இவர்கள் எப்படி ஆய்வு மாணவர்களுக்கு வழி காட்டியாக செயல்பட முடியும். தகுதி வாய்ந்த, பலர் இருக்கையில் இவர்களின் நியமனம் அடுத்த 30 வருடங்களுக்கு எந்த ஒரு பலனும், நாட்டு நலனும் விளைந்திடப்போவதில்லை. பணம் சம்பாதிக்க எத்தனையோ வழிகள் இருக்கும்போது இது போன்ற செயல்கள் நாட்டை, எதிர்கால சமுதாயத்தை அழிவுப்பாதைக்கு எடுத்துச்செல்லும் என்பதில் எள்ளளவும் ஐயமில்லை. மேலும் எதிர்கால சந்ததியினருக்கு சிறந்த ஆசிரியர்களும், வழிகாட்டிகளும் கிடைக்க மாட்டார்கள் இதன்மூலம் சிறந்த ஆய்வாளர்களும் வரப்போவதில்லை. நம் நாட்டின் அறிவியல் ஆய்வியல் வளர்ச்சி என்பது அறவே ஒழிந்துவிடும். பின் வாசல் வழியாக வந்த அணைத்து ஆசிரியர்களும் அவர்களது குழந்தைகளை வெளி நாட்டிற்கு அனுப்பி சிறப்பாக படிக்க வைக்க முடியும். ஏழை நடுத்தர மக்களால் சிறப்பான கல்வியை எங்கு சென்று கற்க முடியும்? இதுபோன்ற கலைகளை வேரோடு பிடுங்கி தீயிட்டு அழிக்கும் வரை வளர்ச்சி என்பது உயர்கல்வி, வளர்ச்சி என்பது ஏழை மற்றும் நடுத்தர மக்களுக்கு வெறும் கனவே....

  • அம்பி ஐயர் - நங்கநல்லூர், சென்னை - 61,இந்தியா

    படிச்சவன் தப்புப் பண்ணினால் ஐய்யோ...ன்னு போவான்....

  • கைப்புள்ள - nj,இந்தியா

    கணபதியை நல்லா பாத்துக்கோங்க சார். எல்லாம் படிச்ச குற்றவாளிகள் இதை பின்னால் இருக்கிறார்கள். என்ன வேண்டுமானாலும் செய்வார்கள்.

  • Srinivasan Kannaiya - muscat ,ஓமன்

    பழி ஓரிடம் பாவம் ஓரிடம்...

  • Srinivasan Kannaiya - muscat ,ஓமன்

    கணபதிக்கு எல்லா இடமும் உடலில் வீங்க போகிறது...

  • Loganathan Kuttuva - Madurai,இந்தியா

    லஞ்சம் காசோலை வழியாக பெறமாட்டார்கள்.

  • RAMAKRISHNAN K - Salem,இந்தியா

    All TVs say 4 days police custody.

  • Tamilan - COIMBATORE,இந்தியா

    கல்லூரி பேராசிரியர் தேர்வு செய்ய தேர்வு முறை (ஸ்லேட்/நெட்) நடை முறைஇல் உள்ளது. இருக்கின்ற பேராசிரியர்களுக்கு தேர்வு மூலமே பதவி உயர்வு சம்பள உயர்வு என்ற முறையை கையாண்டால் எண்பது சதவிகித பேருக்கு உயர்வே கிடைக்காது இதை செய்வீர்களா நீங்கள் செய்வீர்களா?

  • Amirthalingam Sinniah - toronto,கனடா

    லஞ்சத்தின் அழகு முகத்தில் தெரிகிறது. பாவத்தை மறைப்பவன் வாழ்வடைய மாட்டான், பாவத்தை அறிக்கை செய்பவனோ மன்னிக்கபடுவான்.

  • Kasimani Baskaran - Singapore,சிங்கப்பூர்

    உயிருக்கு உத்திரவாதம் இல்லாத நிலையில் அவரை காவலில் விசாரிக்க அனுமதித்தது தவறு...

  • கைப்புள்ள - nj,இந்தியா

    ஹலோ, இனி மேலும் உருவாக கூடாது. அதுக்கு என்ன தண்டனை கொடுக்கலாம். நீங்களே சொல்லுங்க.

  • அன்பு - தஞ்சை,இந்தியா

    திருவாசகத்திற்கு பதில் இராமாயண கதையை படித்தால் வெளிய வந்துவிடலாம் கணபதி.

  • ஜெய்ஹிந்த்புரம் - Madurai,இந்தியா

    கைதிகள் டிரெஸ் போடுவாரா? அது ஏன், பத்து ரூபா பன்னை திருடினா 15 நாள் ரிமாண்டு.. 10 கோடி திருடினா வெறும் 5 நாள்?

கருத்தைப் பதிவு செய்ய

Advertisement